Başy » Hekaýatlar » Adyllyk barada hekaýatlar
Şeýle hadys bardyr: kyýamat güni bolanda – «Ämennä we saddaknä[1] –hezreti Allatagalanyň gaşynda hiç bir kişi oňa adyl patyşadan ýakynrak bolmaz we hiç bir kişi hem zalym patyşadan daşrak bolmaz.
Adyllykda iki peýda bardyr we zulumda iki zyýan bardyr. Adyllykdaky iki peýdanyň birisi budur: Ýurt abat bolup, raýat abadançylykda bolar. Ýene birisi şudur: Adyl patyşaha Haktagala nazar salar. Zulumdaky iki zyýanyň birisi şudur: Ýurt weýran bolup, raýat harap bolar. Ýene birisi şudur: Zalym patyşa dowzah oduna giriftar bolup, kebap bolar.
Älemiň biwepalygy we ömrüň bibakylygy ylymdarlara (akyldarlara) mälimdir we äşgärdir. Onuň üçin akyldarlar oňa köňül bermän eziz ömrüniň hasylyny we ajap wagtlaryny hezreti älemiň Terbiýeçisiniň muhabbetine sarp edýärler. Onsoň belent mertebelere we derejelere mynasyp bolup, wysal tagtynda kämil jemalyň görnüşi bilen başy belent bolýarlar. Soň ýatlarlary ýaly, her kişi öz halyna muwapyk we öz mejalyna laýyk bu älemde bir nyşana goýup barýandyrlar.
Hekaýat
Gürrüňçiler şeýle hekaýat aýdýarlar:
Bir gün bir ýylan gelip, hezreti Murtuza Alynyň gulagyna birnäçe söz aýtdy we gitdi. Eshaplar:
– Bu ýylan size ne söz diýdi - diýip soradylar. Hezreti Murtuza Aly aýtdy:
– Bu ýylan bizden üç sany söz sorady. Ol «Biz jyn taýpasyndan bolarys. Eger bu üç söze jogap aýdyp bilseň, biz iman getireris» diýdi. Ilki «Ýerde şondan köp zat bolmadyk iň köpräk zat näme?!». Soňra – «Asmanda şondan köp zat bolmadyk iň köpräk zat näme?!». Ýene-de – «Ahyretde şondan köp zat bolmadyk iň köpräk zat näme?!» diýip sorady. Men «Dünýäde gaflatdan köpräk zat ýokdur, asmanda perişdeleriň tesbyhyndan köpräk zat ýokdur, ahyretde bolsa, puşmandan başga köpräk zat ýokdur» diýip jogap berdim. Ol ýylan bu jogaby eşidenden, yslamy kabul etdi.
Hekaýat
Gürrüňçiler şeýle hekaýat aýdýarlar:
Isgender Zülkarneýin bir welaýata ýeteninde:
– Bu welaýatyň häkimini alyp geliň. Bu welaýaty oňa berip, ony terbiýeläýin - diýdi. Ol welaýatyň halaýygy:
- Bu welaýatyň bir şazadasy bardyr. Emma ol bir perişan diwanadyr. Ol görüstanyň arasynda mekan tutup ýörendir. Halk bilen asla gatnaşygy ýokdur - diýip aýtdylar.
Şonda Isgender aýtdy:
- Şol diwanyny meniň ýanyma alyp geliň!
Baryp diwanany çagyrdylar. Şonda diwana aýtdy:
Ol diwananyň sözüni gelip, Isgendere aýtdylar.
Şonda Isgender:
– Sözläre goýman, baryp alyp geliň - diýip aýtdy. Bu gezek baranlarynda ol diwana iki sany öli kişiniň iki süňküni eline alyp, Isgenderiň gaşyna geldi we Isgendere salam berdi. Soň ol ölüleriň süňklerini Isgenderiň gaşynda goýup:
- Bu süňkleriň birisi patyşanyň süňküdir, beýlekisi bolsa, gedaýyň süňküdir. Bulary parhlandyr. Bu süňkleriň haýsysy patyşanyň süňküdir we haýsysy gedaýyň süňküdir - diýdi.
Isgender aýtdy:
- Eý, biakyl! Sen niçik bu sözleri aýdýarsyň. Bu çüýrän süňkleri haýsy kişi parhlandyryp biler?!
Şonda ol diwana:
- Ölenden soňra şa bilen gedanyň hiç bir parhy ýokmuşyn. Bes, patyşalykdan myrat (isleg) nedir?! Patyşalykdan näme peýda bar?!
Isgender aýtdy:
- Saňa diwana diýýärler. Sen hut akyl kişi eken sen. Gel, bu ýurduň patyşalygyny kabul et. Saňa uly terbiýet edeýin.
Diwana:
- Meniň elimden patyşalyk gelmez - diýdi.
Isgender ýene-de tagalla baryny etdi. Onsoň diwana:
- Köp yhlaslar edýärsiň. Maňa dört sany zat bergil. Onsoň men patyşalygy kabul edeýin - diýdi. Isgender:
- Ol dört zady aýtgyl. Derrew olary saňa bereýin - diýdi. Diwana aýtdy:
- Onuň biri şudur. Maňa bir dirilik bergil. Ýöne soňunda ölüm bolmasyn. Ýene-de biri maňa ýigitlik bergil. Ýöne soňunda garrylyk bolmasyn. Ýene-de biri maňa baýlyk bergil, ýöne soňunda pakyrlyk bolmasyn. Ýene-de biri bolsa, maňa şadymanlyk bergil, ýöne soňunda gam bolmasyn.
Muny eşiden Isgender aýtdy:
- Eý, diwana! Bu dört närsäni men berip bilmeýärin. Ony Haktagalanyň özi berer. Bulary ondan dilegil.
Diwana aýtdy:
- Eger Haktagala berýän bolsa, sen näme diýip, ara girip ýörsüň?» Meni Haktagala bilen goý. Sen aradan aýrylgyl.
Ondan soň Isgender jogap tapmady.
Hekaýat
Gürrüňçiler şeýle hekaýat aýdýarlar:
Bir jemagat halaýyk bir gämä münüp, derýa (deňze) giripdiler. Birden garşydan bir ýel peýda boldy we ol gämini derýa gark etdi. Bir kişi bir tagta ýapyşyp, bir gyra çykdy we gark bolmakdan halas boldy. Ondan soň ol kişi «Özümi bir abadanlyga (ýaşaýyş bar ýere) ýetireýin» diýip, hereket edip barýardy. Birden uzakdan bir şäheriň garasy göründi Ol şäher tarapa ýüzlendi. Şonda görse, ol şäherde bar bolan halaýygyň barçasy özüne garşy çykyp geldiler. Ol kişini eltip, hammama girizdiler. Patyşalyk lybaslar geýdirip, ata mündürip, sag-solundan begler we döwlet sütünleri görnüş etdiler. Soň ony eltip, tagzym we hormat bilen tagtyň üstünde oturtdylar.
Şeýlelikde, patyşalyk lybaslar geýdirip, patyşalyk nygmatlar getirip, saçaklar ýazdylar. Ondan soň begler we döwlet emeldarlary haremhana tarapa yşarat etdiler. Ol kişi tagtdan düşüp, haremhana ýüzlendi. Ony sahypjemal (görkli) gyzlar garşylap, hormat we tagzym bilen eltip, ony güneş deýin gül ýüzli näzeniniň gaşynda oturtdylar. Ol näzenin hem kämil ynsanlyk hulky we mylaýymlyk bilen goşulyşdy.
Gepiň keltesi, ol bu gije şol haremhanada boldy. Ertesi diwanhana çykdy. Emirler we döwlet sütünleri dessur bilen görnüşe gelip, hyzmatkärlik edeplerini berjaý etdiler. Bu gün ýene bir haremhana yşarat etdiler. Bu haremhana girenden öňki sahypjemal gyzlardan ýagşyrak, gözelräk we owadanrak gyzlar garşy gelip, hezzet we hormat bilen ýene bir gül ýüzlüniň gaşyna eltip oturtdylar.
Bu gije hem bu haremhanada rahatlyk we aýşy-eşret bilen dynç almaga meşgul boldy. Gepiň keltesi daňdan ýene-de dessur bilen diwana çykdy. Ýene-de şol kada we kanun bilen emirler we döwlet sütünleri hyzmatkärlik ýörelgelerini berjaý edip, ýene bir haremhana yşarat etdiler. Onda hem ýüz dürli gözellik we zynat bilen bezelen gül keşpli we anbar saçly gözeller garşylap, eltip bir gül ýüzlüniň gaşynda oturtdylar. Onda hem arkaýynlyk bilen dynç alyp, aýşy-eşreti berjaý etdi. Gepiň keltesi, ondan soň ony dördünji haremhana tarap yşarat etdiler. Baryp görse, bir hüýr keşpli, perişde suratly, gözel, bagtyýar täleýli, başy dik näzenin gözellik tagtynda näzli serwi dek bolup oturan eken. Onuň bilen garyşyp, gujagyna dolanda, onuň söhbeti oňa örän hoş geldi. Onsoň ondan söz sorap aýtdy:
- Eý, göwün awlaýjy eziz ýar! Eý, taýsyz näzenin! Men bir pakyr kişidim. Öz hajatym üçin bir jemagat halaýyk bilen bir gämä münüp, sapar etmegi ygtyýar edipdim. Birden garşydaş ýeller [öwsüp] gämini gark etdi. Ol jemagat halkyň barçasy heläk boldular. Men salamat gutulyp, bu diýara düşdüm. Eýse bu hili döwlet maňa miýesser boldy. Munuň niçik ýagdaýdygyny hiç bilmez men. Bu müşgil işi maňa çözüp bergil.
Ol periýüz şeýle jogap berdi:
- Bu halaýygyň dessury şudur. Her ýylda seniň ýaly bir garyp we ýat kişini patyşa edýärler. Şol taryhy (senäni) ýazyp goýýarlar. Bir ýyl tamam bolanda, ol kişini gämä salýarlar. Bir ada bar. Ol kişini gämi bilen eltip, şol adada goýýarlar. Ýene-de gelip, şäherde bolan barça halaýyk şäherden çykýarlar. Ýene-de gözläp, her ýerde seniň ýaly bir garyby tapsalar getirerler. Ony hem ýene bir ýyla çenli patyşa ederler. Bularyň dessury her ýylda şeýledir.
Ondan soň ol kişi:
- Şu bir ýylda patyşa göteren şol kişisiniň aýdan her bir hökümini ýerine ýetirýärlermi ýa-da ýok?! - diýip sorady. Ol gül ýüzli peri aýtdy:
- Ol patyşanyň aýdan her bir hökümine tabyn bolup, ony kabul edýärler.
Bu sözi eşidenden soň daňdan diwanhana çykdy. Onsoň emirleri we döwlet sütünlerini çagyryp:
- Ol ýerde, ýagny her ýylda patyşalary eltip taşlaýan şol adaňyzda bir şäher bina eder men. Maslahat nedir?! - diýip, sala saldy.
Emirler:
- Höküm we ýarlyk siziňkidir. Herne höküm etseňiz biz taýýar - diýdiler. Ol patyşa höküm edip, ymaratçylar we ussalar iberip, ol adada bir gowy şäher bina etdirdi. Şeýle bir yhlaslylyk we janypkeşlik görkezdiler welin, alty aýda ol şäheriň galasy, bazarlary we öýleri tamam taýýar boldy. Ondan soň derrew genji-hazynalary we haremhanadakylary yzly-yzyna ol şähere iberdi. Özi hem «Haçan ýyl tamam bolup, bu halk meni ol ada eltip taşlarkalar» diýip, üç aýa çenli garaşyp otyrdy. Gepiň keltesi, ýyl tamam boldy. Eýse ol halaýyk öz dessurlary bilen ol kişini gämä mündürip, eltip şol ada taşladylar. Ol adam baryp bir göwün awlaýjy şähere baryp düşdi. Barça halaýyk garşy gelip, ýüz şowk we zowk bilen aýş-u parahat tagtynyň üstünde oturtdylar. Ol entek dirikä şol gül ýüzli peri jemallylar bilen ömür ötürýärdi.
Allatagalanyň çyn bendeleriniň ýörelgesi şudur. Çünki, olar bu dünýäniň bibakadygyny we biwepadygyny ýagşy bilýärler. Şonuň üçin ýagşy amallar edip, özlerinden öň şol mynasyp amallaryny ol äleme iberýärler. Ol amallar olardan öň baryp, olar üçin behiştde menzil we mekan serenjam edip, häzirläp goýýarlar. Şeýle-de ol mynasyp amallaryň bulardan öň baryp, köňli dilän menzilini we mekanyny häzirläp goýýandygy ol adamlara mälimdir. Şonuň üçin olar «Ol menzilimize baryp şatlyk we şadyýanlyk bilen bolmagymyza haçan wagt ýeter» diýip, köňülleri hatyrjem bolup, intizarda ýörerler. Ylahy Hudaýtagala ähli mömin - musulmana ol sagadaty (bagtyýarlygy) nesip etsin. Kabul et eý, älemleriň Eýesi.
Hekaýat
Nowşirwan Adyl adalaty ýaýmak maslahaty üçin hekimleri bilen beglerini jem edip:
- Raýatlar bilen neneňsi gatnaşyk etsek döwletimize mynasyp bolar - diýip sorady. Begler:
- Eger uly patyşa bolaýyn diýseň nökere doly üns ber. Leşgeriňi kuwwatlandyryp, duşman saňa, üstün bolmaz ýaly raýatdan puly köp alyp nökeriňe bergil - diýip, jogap berdiler.
Buzurgmehr:
- Eý, begler! Sizler galat ýola düşüpsiňiz. Raýata zulum edip, zat alsaňyz, onuň bilen nöker köp bolmaz. Sebäbi bir ýyl zulum edersiňiz ýa iki ýyl zulum edersiňiz. Ondan soň raýat ýurtdan gider. Welaýat ekin-dikinsiz galar. Onsoň size kim zat berer we kimden zat alarsyňyz?!
Hekimler bilen begleriň arasynda dawa peýda boldy. Şonda hekim aýtdy:
- Eý, Nowşirwan begleriňe höküm etgil. Goý, şikara çykyp, aw awlap, saňa tutan awlaryny getirsinler. Şeýle hem maňa-da höküm etgil. Men hem aw awlap getireýin. Ondan soň seredip görüň. Olar köp aw getirerlermikän ýa-da men.
Nowşirwan:
- Baryň, aw awlaň. Eliňize her näme düşse getiriň - diýip, höküm etdi. Begler topar-topar bolup atlandylar. Olar bir günde köp aw awlap getirdiler. Ertesi ýene-de atlandylar. Emma düýnki gün hüjüm edendikleri sebäbinden awlar ürküp gidipdiler. Şonuň üçin bu gün hiç aw awlap bilmediler we näumyt bolup geldiler. Dana hekim bolsa, baryp duzak gurdy. Her günde şol bir dessurda aw getirýärdi. Hiç kemelmeýärdi. Ondan soň hekim aýtdy:
- Eger adyllyk etseň şu däne we duzak dek elmydama saňa pul geler durar we hazyna doly bolar. Eger şu begler ýaly zulum etseň, bir günde tamam ili ürküzersiň. Onsoň hiç zat tapmarsyň.
Hekaýat
Hezreti Murtuza Alyda (Allatagala ony sahawatlandyrsyn) «Bu dünýäni göreýin. Ol ne dürli görnüşdekä» diýen alada peýda boldy. Ol bu pikirdedi. Birden uzakdan bir aýal göründi. Ol nepis lybaslar geýip, sahypjemallyk (gözellik) şiwesi (näzirgemesi) bilen mahbuplarça jilweler kakýardy. Ol hezreti Murtuza Ala yşarat etdi. Hezreti Murtuza Aly ol tarapa ýüzlenenden, ol aýal hem aňyrrak gitdi. Hezreti Murtuza Aly hernäçe ol tarapa ýörese, ol has aňyrrak gidýärdi. Örän gaty hereket edip, ahyrynda yzyndan ýetdi. Eýse ol aýal ýüzüni açdy. Hezreti Murtuza Aly görse, ol bet gepli, betşekil, betnazar, porsy agyz, gara ýüzli bir kempir eken. Şeýle-de bir eli hyna bilen reňklenen we bir eli doly gan eken. Murtuza Aly sorady:
- Sen ne dürli zat sen?! Daşdan şeýle bir owadan, görkli we göwün awlaýjy göründiň. Ýakyn geleniňde welin, munuň ýaly bethaýbat we garaýüzli şeýle bir kabyh (erbet-hapa) görünýärsiň?!
Ol aýal aýtdy:
- Eý, emir! Dünýä diýýänleri mendirin. Uzakdan iliň gözüne şunuň ýaly ýagşy görünýärin. Ýakyn gelip, meni görenler we meni dilänler (höwes edýänler) puşmanda bolarlar.
Murtuza Aly sorady:
- Bir eliňde gan, beýleki eliňde hyna[2] bar. Ol näme üçin beýle?!
Ol aýal aýtdy:
- Günde bir elim bilen müň ýerde toý we baýramçylyk düşegini salýaryn. Beýleki bir elim bilen müň kişiniň ganyny dökýärin.
Hekaýat
Şeýle hekaýat edýärler:
Isgender Zülkarneýn bir welaýata ýetdi. Görse süri-süri goýunlar gezip ýör, çopany ýok. Süri-süri düýeler gezip ýör, sarwany ýok. Süri-süri ýylkylar gezip ýör, ýylkyçysy ýok. Barça goýunlar, düýeler we ýylkylar biri-birlerinden kem ýa-da zyýat bolman barabardylar. Şeýle-de baglarynda miweler ýetişip bişipdir. Emma, bagbany ýok. Isgenderiň leşgerinden bu maldyr miwelerden alyp iýen her bir kişi derrew hassa boldy. Isgender bu haly görenden:
– Hiç kimse bu mal we miwelere zyýan ýetirmesin – diýip, höküm etdi. Soň:
– Baryp görgül. Bu welaýatyň içinde hal (ýagdaý) neneňsikä – diýip, bir kişini bu welaýata iberdi. Ol kişi bardy. Görse, bazary bezegli we düzüw eken. Dükanlar her hili zatlardan doly eken. Emma, satyjylar we dükançylar ýok eken. Köp hereket edip, bir kişi tapdy we ondan sorady:
- Bu şäheriň bazar halaýygy nirededirler?!
Ol kişi:
- Bu halaýyklaryň barçasy ybadathana girip, Taňrytagala ybadatyna meşguldyrlar - diýdi.
Ol kişi bu kişiniň öňünden ýöräp, ybadathana eltdi. Şonda Isgenderiň gelendigini ol halka bildirdiler. Ol halaýyk derrew ol ybadathanadan çykyp, patyşalarynyň yzlaryna eýerip, peşgeşler alyp, Isgenderiň öňünden çykdylar. Şonda Isgender olardan sorady:
- Bu niçik ajap we geň ýagdaýdyr. Siziň baýlyklaryňyza we emläkleriňize gözegçilik edýän hiç kim ýokdur. Barça mallaryňyz deň. Olar biri-birinden zyýada ýa-da kem däldir. Siziň mallaryňyzdan alan her bir kişi derrew hassa boldy. Bu ýagdaýy maňa beýan ediň.
Ol halkyň patyşasy aýtdy:
- Biziň aramyzda her bir kişi müflis (garyp) bolsa, barymyz ýygylyp, ol kişini mal we jemgyýetde özümiz bilen barabar edýäris. Şol sebäpli biziň aramyzda ogry we talaňçy bolmaýar. Onsoň herne bar bolan malymyzy Allatagala tabşyrandyrys. Biz onuň bendeligine meşguldyrys. Ol jähtden biziň malymyzy Allatagala gorap saklaýar. Hiç kişi biziň malymyzdan alyp bilmez. Eger alsa hem hassa bolar.
Isgender aýtdy:
- Meniň bu jahany eýelemegimiň myrady seni görmegim eken. Gel indi, meniň bilen bile bolgul. Bu älemiň ýarysyny saňa bereýin.
Onda ol patyşa:
- Meniň sabyr we çydamym mundan artyk ýurdy dolandyrmaga takat edip bilmez. Eger mundan artyk döwlete häkim bolsam, belki, gözegçilik edip bilmerin we Taňrytagalanyň gaşynda asy (günäkär) bolar men. Maňa mundan artyk teklip etmegil - diýdi.
Isgender hem onuň günäsini ötdi.
Hekaýat
Şeýle hekaýat edýärler:
Soltan Sanjaryň atasy Soltan Mälik şa-dy. Onuň atasy Alp Arslandy. Soltan Mälik şa Yspyhan welaýatyna seýil etmäge çykypdy. Bir ýerde düşläp, gije ol ýerde ornaşanda soltanyň gullary bir garry aýalyň sygryny öldürip iýipdirler. Daňdan ol aýal «Sygryňy soltanyň gullary iýipdir» diýip, habar eşitdi. Onsoň eline hasasyny alyp, Zenderut diýen bir köprini tutup durdy. Soltanyň güzeri şol ýerden geçýärdi. Soltan ol köpriniň üstüne gelende, ol aýal perýat edip aýtdy:
- Eý, Alp Arslanyň ogly! Bu gün bu köpriniň üstünde meniň dadymy bergil. Bolmasa taňla Syrat köprüsiniň üstünde seni tutaryn.
Soltan atynyň jylawuny çekip:
- Aýt, näme dadyň bar?! - diýdi.
Ol aýal:
- Meniň bir sygrym bardy. Gün-güzeranymy şol sygryň arkasyndan geçirýärdim. Ony bu gije seniň gullaryň öldürip iýipdirler. Şol gullaryňdan meniň dadymy alyp bergil - diýdi.
Soltan aýtdy:
- Bir sygryňa on sygyr bereýin. Razy bol.
Ol aýal aýtdy:
- Ýok, meniň dadymy gullaryňdan alyp bergil.
Soltan aýtdy:
- Ýigrimi sygyr bereýin.
Aýal kabul etmedi. Gepiň keltesi, soltan segsen sygra çenli bardy. Ol aýal kabul etmedi. Ondan soň soltan ol köpriniň üstünde atyndan düşüp oturdy we «Şol gullary tapyp getiriň» - diýip höküm etdi. Tapyp getirdiler. Jellada buýruk berdi. Jellatlar olary para-para etdiler we her parasyny bir derwezeden asdylar. Ol aýala hem segsen sygyr berip, hoşal etdiler.
Elkyssa, soltanyň şu görnüşli adyllyk we adalat bilen ol aýala mähremlik edenine birnäçe wagt geçenden soň, oňa takdyry asmany we Taňrytagalanyň kazasy (ýazgydy) ýetişdi. Soltan Mälik şa pany jahandan baky äleme göç etdi. Ol aýal soltan Mälik şanyň wepat bolandygynyň habaryny eşidende, gije turup başyny ýalaňaçlap, ak saçyny ýaýdy. Perýat we pyganlar edip «Eý, bar Hudaýa! Soltan Mälik şa maňa adyllyk edipdi. Oňa rehmet etgil» diýip, nalyş etdi. Aýdyşlaryna görä, şol gije Yspyhan şäheriniň tamamy halky düýş görüpdirler. Görseler, soltan Mälik şa behişdiň içinde seýil edip ýören eken. Ondan soradylar:
- Behişde girer ýaly näme iş etdiň?!
Soltan aýtdy:
- Bir garry aýala adyllyk edipdim. Şonuň üçin Hudaýtagala meni bu döwlete ýetirdi we başymy belent etdi.
Hekaýat
Soltan Mahmyt Gaznalynyň gaşyna bir derwüş gelip adalat etmegini isläp aýtdy:
- Eý, soltan! Birnäçe betkär bozuklar gije ýarym bolanda meniň öýüme gelýärler. Meniň bir aýalym bar, olar onuň bilen bozuk işler edýärler. Maňa jebri-jepa berýärler. Olardan gorkunjymdan asla dem urup bilmeýärin. Eger demimi çykarsam, meni öldürerler.
Soltan aýtdy:
- Her haçan olar gelseler, sen derrew özüňi meniň ýanyma ýetirip, meni habardar et. Onsoň seniň dadyňy olardan alaýyn.
Ol derwüş bu söz bilen umytly bolup, öýüne bardy. Üç günden soň gijäniň ýary, ol bozuklar ýene onuň öýüne geldiler. Ol derwüş derrew özüni soltanyň gaşyna ýetirip:
- Ol betbagtlar ýene geldiler - diýdi.
Soltan derrew şemleri yşyklandyryp atlandy. Ol derwüşiň öýüniň degresini gabap, ol bozuklary tutdular. Soltan:
- Şemleri öçüriň we bozuklary öldüriň - diýip höküm etdi. Şemleri öçürip, bozuklary öldürdiler. Ondan soň:
- Ýene şemleri ýakyň - diýip buýurdy. Soň soltan:
- Ölüleriň kellelerini getiriň - diýdi. Getirdiler. Görüp, Allatagala sejde etdi.
Ondan soň soltan aýtdy:
- Eý derwüş! Heý bir tagamyň barmy?! Men aç.
Derwüş derrew nan bilen sirke alyp getirdi we aýtdy:
- Eý patyşa! Mende bar bolan zat şudur.
Soltan ol nan bilen sirkeden örän köp iýdi.
Derwüş sorady:
- Eý, din soltany! Bu gelşiňden mende iki iş müşgil boldy. Ony maňa çözüp bergil. Olaryň biri şudur. Ýagny bu betbagtlary öldüreniňde şemleri öçürtdiň. Öldüreniňden soň ýene ýakdyrdyň. Ikinjisi bolsa şudur, ýagny derwüşleriň tagamyndan örän köp iýdiň?! Sebäbi näme?!
Soltan aýtdy:
- Arzyňy maňa aýdan şol gijäň öz-özüm oý edip «Meniň zamanymda munuň ýaly ýaman işi hiç kim edip bilmez. Diňe maňa ynanyp (arkalanyp), munuň ýaly işi oglum edip biler» diýip, pikir etdim. Ol eger meniň oglum bolsa, oňa gözüm düşende, ata-da ogla bolan mähir herekete gelip, ony öldürip bilmezdim. Şemi şonuň üçin öçürtdim. Öldürenimden soň şemi ýakdyrdym. Görsem oglum däl eken. Şonuň üçin Taňrytagala sejde edip şükür etdim. Seniň bu sözüňi (habary) aýdan wagtyňa üç gün boldy. Men üç günden bäri tagam iýen däldirin. Şonuň üçin nany köp iýdim.
Hekaýat
Süleýman alaýhyssalamyň ýanyna bir peşe-çybyn gelip, ýelden şikaýat edip:
- Ýel sebäpli bu älemde bir pursat parahatlyk we rahatlyk bilen uçup bilmeýäris. Şonuň üçin kynçylykda galyp, örän teşwüşde we närahatlykdadyrys. Ýel seniň permanyňdadyr. Höküm etgil. Goý, bize päsgel bermesin - diýýär.
Süleýman alaýhyssalam aýtdy:
- Sen öz sözüňi arz etdiň. Indi ýeli çagyralyň. Göreliň, onuň sözi neneňsikä?
Ýeli çagyrdylar. Ýel gelenden çybyn ýok boldy. Hernäçe gözleseler-de tapylmady. Süleýman alaýhyssalam aýtdy:
- Adalat kadasy şudur. Häkim arz edýäniň arzyny ýalňyzlykda soramaly däldir, hata bolar. Ikisi hem bile bolmasa arz soralmaz. Eger ikisi hem bar bolsa, şol wagt soramak gerek. Olar her sözi bar bolsa, barabar aýdarlar. Şonda häkim olaryň sözüni bilip (diňläp), dadyna ýeter.
Hekaýat
Gürrüňçiler ýene-de şeýle diýýärler:
Kyýamat güni hezreti Allatagala tobany bir surat [keşp] bilen ýaratjakdyr. Ol suratdan [keşpden] şeýle bir ýagşy yslar geler welin, her kişiniň burnuna onuň ysy girse, burny (beýnisi) atyrlanyp, şatlyk we begenç bilen magşarda ýörer. Käbirleri olardan:
- Sen, ne dürli zat sen! Seniň ysyňdan käbirleri joşgun tapýarlar, biz tapmaýarys - diýip sorarlar. Onda ol surat:
- Maňa toba diýerler. Ol dünýäde meni bir zamanda ýüz gezek agzyňyza alýardyňyz. Emma hiç perwaý etmeýärdiňiz. Şonuň üçin menden peýda görmeýärsiňiz - diýip jogap berer.
Hekaýat
Gürrüňçiler şeýle hekaýat edýärlerler:
- Bir sälih derwüşe tarykat babynda bir müşgillik düşdi. Ony bir muktyda (yzyna eýerdýän pir) çözüp biljekdi. Ol wagtlarda onuň ýaly kişi ýokdy. Ol derwüşiň müşgili çözülmedi. Garaşýardy we haýrandady. Bir gije «Pylan patyşanyň işiginde bir ýasawul bardyr. Seniň müşgiliňi ol çözer» diýlen düýş gördi. Oýandy.
Eýse pikir edip:
- Bu düýşüm şeýtanydyr. Onuň ýanyna barar ýaly ýasawulyň tarykat babyndan niçiksi habary bolsun-diýdi. Soň ýene-de uklady. Ýene-de şol wakany gördi. Ýene-de öz-özi pikir edip:
- Meniň bu düýşim şeýtanydyr-diýdi we ýaňadan uklady. Eýse ýene şol wakany gördi. Ondan soň turup, säher bolandan ol patyşanyň dergähine bardy. Uzakdan ol ýasawuly gördi. Ol eline taýak alyp, başyna uly selle orap, hajyplar şekilinde haýbat bilen duran eken. Geň galyp:
- Bu görnüşdäki kişiniň tarykat ýörelgesinden ne habary bolsun ‑ diýip, yzyna gaýtdy. Eýse ol ýasawul ony çagyryp:
- Seniň boýnuňdaky damarlaryň ne bela gaty eken. Saňa şunça yşarat etdiler, sen asla habarly bolmadyň. Seniň ol müşgil işiňi men çözerin - diýdi.
Elkyssa, ol derwüşde bolan her bir müşgili edil isleýşi dek çözüp berdi.
Ondan soň ol derwüş:
- Ol Ýaradan Hudaýyň haky we hormaty üçin aýtgyl. Sen bu mertebäni nireden hasyl etdiň?! - diýip sorady.
Ol ýasawul aýtdy:
- Her säher ýerimden turanymda «Bu patyşanyň işiginde bar bolan ýa-da ýüze çykan şerigata garşy gelýän her bir işleri aradan aýyryp, pakyr we misginiň sözüni arz edeýin» diýip niýet edýärin. Egerde şerigata bap gelmeýän işleri we zulumlary dep edip bilsem, öýe şadyýan bolup barýaryn. Bolmasa olaryň pikir we endişesinde tä şol işleri ahyryna ýetirýänçäm aram (karar) tapmaýaryn. Bu niýetiň mende bar bolany üçin Hezreti Haktagala maňa bu mertebäni beripdir, ýagny tä gündogardan günbatara çenli barça älemiň ahwaly maňa mälimdir.
Hekaýat
Bir şäher gözegçisi bardy. Hemişe patyşanyň işiginde durup, ejiz galan garyp [biçäreleriň] sözlerini patyşa baryp aýdyp, olaryň hajatlaryny ýerine ýetirerdi. Şol jähtden her gün Hydyr alaýhyssalam gelip, ol gözegçi (sakçy) bilen söhbet tutýardy. Bir gün ol sakçy pikir edip öz-özüne:
- Hydyr dek uly kişi meniň bilen söhbet tutup durka patyşanyň işigine barmagyň maňa näme zerurlygy bar ‑ diýip, Hydyr bilen söhbet tutmak üçin bir ýerde köşe tutdy. Ondan soň Hydyr alaýhyssalam asla onuň gaşyna gelmedi. Ol sakçy alty aýa çenli intizarlyk çekdi. Emma Hydyr alaýhyssalam gelmedi. Ondan soň pikir edip öz-özüne:
- Hydyr alaýhyssalam meniň gaşyma gelmedi. Gel, indi baryp, ýene-de patyşanyň hyzmatynda öňki işime meşgul bolaýyn - diýip, patyşanyň işigine geldi we ýene-de öňki işine meşgul boldy. Hydyr alaýhyssalam ýene onuň gaşyna geldi. Şonda sakçy aýtdy:
- Eý Hydyr alaýhyssalam! Men seniň söhbetiň üçin patyşanyň hyzmatyny terk edip, «Rahatlykda seniň bilen söhbet tutaýyn» diýip köşe tutdym, [ýagny bir künjegi ygtyýar etdim]. Sen meniň ýanyma asla gelmediň.
Hydyr alaýhyssalam aýtdy:
- Sen ejiz galan garyp-biçäreleriň hajatlaryny bitirýärdiň we köňüllerini şat edýärdiň. Men şonuň üçin seniň bilen gatnaşardym, söhbet tutardym. Indi sen olary goýduň, men hem seni goýdum.
Hekaýat
Harun ar-Reşit halypanyň üç sany nikaly aýaly we bir gyrnagy bardy. Bir mahal halypanyň agzynda bir kesel peýda boldy. Ondan porsy ys gelýärdi. Aýallary göwnüne degmejek bolup, hiç zat diýmeýärdiler. Ol bir gije gyrnagynyň ýanyna geldi. Eýse gyrnagy aýtdy:
- Eý, halypa! Seniň agzyňda bir kesel peýda bolupdyr. Erbet ys gelýär. Halypa gaharlanyp:
- Onuň ýaly bolsa, ony maňa aýallarym aýtmazmydy?! - diýdi.
Gyrnagy aýtdy:
- Eý halypa! Olar seniň göwnüňe degmejek bolýarlar. Men dogrymy aýdýaryn. Sen tebibi çagyrgyl we soragyl. Eger meniň sözüm galat bolsa, meni öldürgil.
Halypa daňdan, irden tebibe kişi iberip, çagyryp getirdip, agzyny görkezdi. Eýse tebip:
- Eý halypa! Seniň agzyňda bir kesel peýda bolupdyr. Eger maňa rugsat berseň, üç günde agzyňdan müşk ysy geler ýaly alaç edeýin - diýdi.
Halypa derrew:
- Şeýle et - diýdi.
Tebip bejermäge meşgul boldy. Üç günden soň ol kesel dep boldy. Ondan soň halypa ol gyrnagyna uly terbiýet-hormat edip:
- Rehmet saňa! Sen meniň aýbymy aýtdyň we men oňa alaç etdirdim. Eger aýtmasaňdyň (aýtmadyk bolsadyň), men aýply we keselli bolardym. Meniň döwletimiň ýagşylyk isleýjisi sen ekeniň - diýdi. Ol üç aýalyna bolsa talak berdi.
[1]Oňa (kyýamat gününe) «Ynandyk we tassykladyk».
[2]Birnäçe halklarda, şol sanda käbir türkmen taýpalarynyň arasynda hem toýlarda, esasan hem gelin alma toýlarynda ellerine hyna çalmak däbi bar. Bu ýerde şol göz öňünde tutulýar.