Başy » Kitaplar » ПЫГАМБЕРИМИЗИ МЫХМАН АЛАН САХАБА » ЭбуЭйюбың Җеннет билен бушланмагы
Пыгамбер Серверимиз саллаллаху алейхи веселлемиң сөвешлериниң ичинде иң илкинҗиси хем-де хас мөхүми болан, Ысламыетиң эсасыны гоян Бедир сөвешидир. Шу сөвеше гатнашан муҗәхидлериң тә Кыямата ченли Алла ёлунда болҗак сөвешлериң әхлисине гатнашып, онда шехит дүшҗеклериң согабына барабар согап аландыклары беян эдилйәр. Чүнки Хак Субханеху ве Тагала Хезретлери Бедир сөвешиндәки мусулманлара ыззат багыш эдип, капырлары-да меламата хөкүм этдигини Куръаны-Кериминде ыглан эдипдир. Шу себәпден Бедир сөвешине гатнашан Эсхабы-Кирамың ашакдакы үч саны дереҗә эе боландыклары хакыкыдыр.
1.Бедир эсхабының хеммеси «Эбрардандыр» я олар садык хем салых, Аллах ве Ресулаллахың янында ыкрар эдилен ынсанларды. Хак Субханеху ве Тагала Хезретлери Куръаны-Кериминде мүҗәхитлериң дири галанларыны гахрыманчылыгы биле, арадан чыканларыны болса, шехитлик мертебеси биле магтайшы ялы, Ресулы-Экрем саллаллаху алейхи веселлем Серверимиз хем Хадиси-Шерифлериниң биринде шейле буйряр: «Җеннетиң сизиң үчин ваҗып боландыгы шүбхесиздир». Бухари-Шерифде роваят эдилен Пыгамбер Серверимиз саллаллаху алейхи веселлемиң огуллыгы Зейд разыяллаху анхуның какасы Харисе разыяллаху анху Бедир сөвешинде шехит боланда, Ресуллуллах саллаллаху алейхи веселлем ол хакында: «Ол Фирдөвс Җеннетиндедир» диййәр. Бедир сөвешине гатнашан үч йүз төвереги сахабаларың ичинде Хезрети Эбу Эйюп Эл-Энсары разыяллаху анху хем бардыр. Бир Хадиси-Шерифде Җеннет билен бушлук берлен сахабалар шу ашакдакылардыр: «Эбу Бекир, Омар, Осман, Алы, Талха, Зубейр, Абдырахман, Сад, Саид, Эбу Убейда разыяллаху анхум. Эмма булардан башга-да, Хезрети Хатыҗайы-Кубра хем Фатиматуз-Зөхре, Билал Хебеши, шейле-де Эбу Эйюп Эл-Энсары разыяллаху анхум хем Җеннет билен бушлук аланларың арасында бардыр.
2.Бедир сөвешине гатнашян муҗәхитлере көмек үчин Хак Тагала Хезретлериниң Перишделери топар-топар эдип, иберендиги Куръаны-Керимде өз беяныны тапандыр. Перишделериң хем сахабаларың арасында Алла үчин эгин-эгне берип җихәд эден Эбу Эйюп Эл-Энсарының мертебесиниң Аллахың хем онуң Ресулының хузурында нәхили белентдиги өз-өзүнден дүшнүклидир. Бедир сөвешине гатнашан мүҗәхитлер хакында Җебрайыл алейхыс салам Пыгамбер Серверимиз саллаллаху алехйи веселлемиң янына гелип:
-Я, Ресул Алла! Араңыздакы бар болан Бедир гахрыманларыны нәхили мертебеде хасаплаярсыңыз?!-диенде, Пыгамбер Серверимиз саллаллаху алейхи веселлем шейле җогап берйәр: «Олар мусулманларың иң белент дереҗесиндәки ынсанлардыр». Җебрайыл алейхыссалам хем: «Бизем перишделерден Бедир сөвешине гатнашанлары перишделериң иң шереплиси хем хайырлысы хасаплаярыс» -диййәр.
3.Сунени Тирмизиде роваят эдилен бир Хадиси-Шерифде бир киши Пыгамбер Серверимизиң хузурына гелип, Хатиб бин Белтеа разыяллаху анху хакында «бу кишиниң нара (довзаха) гирҗекдиги шүбхесиздир» диенде, Серверимиз:
-Ёк, сен ялан сөзледиң. Хатиб нара гирҗек дәлдир. Чүнки ол Бедирде хем Худайбиеде болан Эсхаби-Кирамың арасында сөвешди. Олар болса, нара лайык дәлдирлер, дийип ол кишиниң айданларыны рет эдйәр. Пыгамберимиз саллаллаху алейхи веселлемиң Пыгамбердигине иман гетирен Хатиб бин Белтеа разыяллаху анхуны хиҗретиң алтынҗы йылында Искендериеде Мүсүр шасы Мукавкыса илчи эдип иберипди.