Başy » Kitaplar » Soltan Sanjara bagyşlanan nesihatlardan parçalar » IMAN DARAGTYNYŇ SUWLANÝAN SAKASY BOLAN IKI ÇEŞME
Iman daragtynyň kökleri we şahalary mälim bolandan soň, ol agajyň ondan suw içýän iki sany ylym-bilim çeşmesini öwrenmek zerurdyr.
Birinji çeşme – dünýäni tanamak, ýagny dünýä näme we adamzadyň dünýä näme üçin iberilendigine akyl ýetirmekdir.
Bilgin, eý, yslam soltany! Dünýä karargäh däl-de, bir menzilgähdir, düşelgedir, gonalgadyr. Ömrüňden geçip barýan her bir ýylyň edil syýahatçynyň bir günde geçýän menzili kimindir. Her bir güni syýahatçynyň geçýän bir parsahlyk ýoly, her bir demi onuň bir ädimi ýalydyr.
Seniň alýan her bir demiň seni ahyrete barha golaýlaşdyrýandyr. Bu dünýä bir köpri mysalyndadyr. Kim köpriniň üstündekä saraý gurmak, ymarat galdyrmak bilen meşgul bolsa we şonuň bilen ömrüni geçirip, bu dünýäniň menzilgähdigini unutsa, ol adam biakyldyr.
Akylly adam şeýle bolar: ol dünýä menzilgähinde ahyret azygynyň aladasyndan başga hiç zat bilen meşgul bolmaz. Dünýä nygmatlaryndan diňe özüne ýeterlik mukdaryny alyp, şonuň bilen kanagat eder. Dürli nygmatlardan gereginden artyk toplanan zatlar seniň başyňdan hasrat tohumy bolup iner we ölüm howply zäher bolar. Ölüm pillesi jan tabşyrmak saňa gaty kyn düşer. «Halala hasap bar, harama – azap». Bu dana sözüň birinji böleginde mal-baýlygyň halal ýol bilen ýygnalan wagtyndaky ýagdaý beýan edilýär, ikinji böleginde bolsa mal-baýlygyň haramlyk bilen toplananda, ol kişiniň öz ahyretiniň azabyny bu hasratdan hem beter agyrlaşdyrjakdygy aýdylýar.
Dünýäniň birnäçe günlük mähnetine sabyr edip, muşakgatlaryna döz gelseň, ebedi patyşalyk taparsyň. Bu diňe akylly hem özüne erk edip bilýän adamlara başardýandyr.
* * *
Bilgin, eý, yslam soltany! Dünýäniň hezilligi birnäçe günlükdir. Ol hem gaýgy-hasrat, jebir-jepa bilen garylandyr. Şol birnäçe günlük sabyrdan baky rahatlyk we ebedi patyşalyk hasyl bolýandyr. Hemişelik rahatlyk üçin, birnäçe günlük sabyr – akylly, parasatly kişi üçin aňsat bolar.
Bir magşugy bolan aşyk kişä şeýle diýip ýüzlenýärler: «Eger şu gije magşugyň ýanyna gelseň, ony soňra gaýdyp hiç haçan görmersiň. Eger şu agşam sabyr etseň, hiç bir ünjüsiz-gaýgysyz, howpsuz-hatarsyz ony saňa müň gijelik tabşyrýarys». Eger onuň aşyklygy şeýle güýçli bolsa, bir gijelik sabyr onuň geljekki müň gijesi üçin aňsat bolar.
Dünýäniň müddeti ahyretiň müňden bir müddetiçe-de ýokdur. Asla onuň bilen deňeşdirerligi hem ýokdur. Ol – ahyret bir çäksizlikdir. Onuň dowamlylygy aňa-da sygmaýar. Dünýäniň ahwalaty, gurluşy hakda bir aýratyn kitap ýazdyk, ýöne häzir dünýäniň ahwalatyny on sany mysal arkaly beýan etmek bilen çäklenýäris. Indi bolsa olary aýtmaga başlaýarys.
Birinji mysal
Pygamberimiz (oňa Allanyň salawaty bolsun!) aýtdy: «Dünýäden heder ediň, ol Harut we Marutdan hem jadygöýräkdir. Onuň ilkinji jadygöýlügi şeýledir: ol özüni saňa görkezer. Sen ol ymykly oturymlydyr we özüň bilen bile bir ýerde bolar öýdersiň. Çünki, oňa seretseň, ol oturymly bolup görner, emma göçüp-gonup ýörendir. Hemişe senden gaçýandyr, ýöne ýuwaşlyk bilen assa-assa, nepes-nepes hereket edýändir. Dünýäniň mysaly bir kölege kimindir, seretseň welin, oturymly ýaly bolup görünýär, özi bolsa şol hereket edip gidip barýandyr. Adam ömri hem edil şonuň ýaly dowam edip barýandyr we ýuwaş-ýuwaşdan her pursatda azalyp, kemelip barýandyr. Dünýä ýaly ol hem senden gaçýandyr, saňa «hoş gal» diýýändir, sen bolsa ondan gapyl hem bihabarsyň.
Ikinji mysal
Dünýäniň indiki jadygöýlügi şeýledir: seni bendi etmek üçin, özüni saňa dost hökmünde görkezer. Seniň bilen oňuşjakdygyny we başga hiç kimiň ýanyna gitmejekdigini saňa ynandyrar. Haçanda, sen bir ýerde jaýlaşykly oturanyňda, ol duýdansyz seniň ýanyňdan turar-da gider. Soňra birdenem seniň duşmanyňa öwrüler oturyberer. Dünýäniň mysaly edil erkekleri aşyk etmek üçin özüne çekýän, soňra öýüne äkidip, heläk edýän ahlaksyz, bozuk we jenaýatkär bir aýala meňzeýändir.
Isa alaýhyssalam dünýäni bir garry aýalyň sypatynda görüpdir. Ol aýaldan:
– Näçe adamyň bardy? – diýip sorapdyr.
Aýal:
– Köplüginden ýaňa sanap soňuna çykyp bolmaýar – diýipdir.
Isa:
– Olar öldülermi ýa-da saňa talak berdilermi? – diýipdir.
Aýal:
– Ýok. Olaryň ählisini men öldürdim – diýipdir.
Bu jogaby eşiden Isa:
– Men bu akmaklara geň galýan. Beýlekiler bilen näme edendigiňi görseler-de, seniň nähili adamdygyňy bilseler-de, ýene-de saňa meýil edýärlermi, mundan sapak almaýarlarmy? – diýdi.
Üçünji mysal
Dünýäniň indiki jadygöýlügi şundan ybaratdyr: onuň owadan daşky keşbi bardyr. Ol ähli gam-gussalaryny, bela-beterlerini örter-de, bassyr-bussur eder, tapan-tupan bezeg serişdeleri bilen özüne aňrybaşy zynat berer. Soňra özüni ýakyn-u alysdaky adamlara göz eder. Ol nadan adamlar onuň daşky keşbine seredip, topalaň turuzarlar we tora düşerler, garaklaryny gapdyrarlar. Dünýäniň mysalyny şunuň ýaly aýalyň sypatynda görmek bolar: bir betgelşik garry aýal ýüzüni örtüp, owadan eşikleri geýip, özüniň daşky keşbine aşa owadanlyk, gözellik berýär. Daşyndan gören adamlar onuň üstünde topalaň turuzýarlar, haçanda, çadyryny sypyranlarynda, onuň masgaraçylyklaryny görüp, puşman edýärler.
Habarda şeýle berilýär: Dünýäni gök, pişik gözli, dişleri daşyna sommalyp, aňňaryp çykyp duran bir betgelşik garry aýalyň sypatynda kyýamatyň gapysyndan getirýärler. Adamlar muny görüp:
– Mundan Alla saklasyn! Beýle ryswaçylyk we betnyşanlyk nämedir?! – diýişýärler. Şonda olara:
– Bu siziň üstünde gabanjaňlyk edip, biri-biriňiz bilen duşmançylyk, gyrlyşyk eden ol dünýäňiz. Siz bu sebäpli nähak ganlary dökdüňiz, biri-biriňiz bilen garyndaşlyk aragatnaşygyňyzy kesdiňiz. Şeýdibem, oňa özüňizi aldatdyňyz – diýýärler. Şol wagt dünýäni dowzahyň içine alyp gelýärler. Ol şonda:
– Eý, Hudaý! Hany meniň dostlarym?! diýip gygyrar. Şondan soň dünýäniň dostlaryny hem dowzahyň içine alyp gelerler – diýýär.
Dördünji mysal
Bu dünýäniň mysalyny başlangyjy – sallançak, ahyry – gabyr bolan syýahatçynyň geçýän ýoly diýip düşünmelidir. Bu ikisiniň aralygy bolsa birnäçe çäklije menzildir. Bu barada şeýle diýilýär: Syýahatçynyň her ýyly bir menzil, her aýy bir parsah, her güni bir mil, her nepesi bir ädim ýalydyr. Ol yzygiderli dowam edip barýandyr. Kimsäniň bu ýoldan bir parsagy galandyr, kimsäniňki mundanam azrakdyr, ýene biriniňki bolsa mundan köpräkdir, emma ol mundan bihabar, göýä, bu ýerde hemişelik galjak ýaly, hiç zatdan habarsyz arkaýyn gaýşaryp oturandyr.
Bäşinji mysal
Bilgin, bu dünýädäkileriň mysalasy şunuň ýalydyr: olar bu dünýäniň lezzetini alansoňlar, dünýäniň gaýgy-gussasyny, ryswaçylygyny ahyretde görerler. Kim süýji, ýagly, lezzetli tagamlary köp iýse, onuň aşgazany zaýa bolar. Şol wagt öz aşgazanyndan erbet, ýakymsyz ys çykaryp, içini boşadar hem-de bu zatlary görüp, erbet utanar, lezzet geçdi, masgaraçylyk galdy diýip, ol bu zatlara aşgazany zaýa bolandan soň puşman eder. Ýöne mundan soňky puşmanyň ne peýdasy bar? Tagam näçe ýakymly boldugyça, onuň löderesi şonça-da ýakymsyzdyr, aňkap durandyr. Şonuň ýaly-da, dünýä bilen ülpet bolmagyň lezzeti näçe hezil bolsa-da, onuň ahyry gaty howpludyr. Bu howp jan tabşyrmaly wagtyň aýan bolýandyr. Köp mal-baýlygy, bagy-bossanlygy, kenizleri, gulamlary, altyn-kümüşleri bar bolan kişiniň jan beren pursatynda, bu zatlardan aýrylýandygyna gynanyp çekýän jebir-jepasy bu zatlary az bolan adamyňkydan has agyr bolýandyr. Ol jebir-jepa, azap-görgi, ölmek bilen ýok bolup gidýän däldir, gaýtam, has köpelýändir. Çünki, şol baýlyklary gowy görmek – kalbyň, ruhuň häsiýeti. Kalp, ruh bolsa hemişe öz ýerinde bolýandyr, hiç haçan ölýän däldir.
Altynjy mysal
Bilgin, eý, yslam soltany! Dünýäniň işleri örän gysgajyk bolup görünýändir. Adamlar özleriniň bu dünýedäki wezipeleri uzaga çeker diýip pikir ederler, emma dünýäniň bir işinden ýüz işiň emele gelýän pursatlary hem bolýar. Ine, şeýlelikde, adamyň tutuş ömri şoňa sarp bolýandyr. Hezreti Isa pygamber alaýhyssalam aýtdy: «Dünýä üçin hars urýanyň mysaly deňiz suwundan hernäçe içse-de, ganman, tä heläk bolýança içýän, ýöne şonda-da teşneligi aýrylmaýan, suwsuzlygy ganmaýan teşnä meňzeýär».
Pygamber aýtdy: «Deňiz suwuna girip, öl bolmazlyk hiç kime mümkin däldir, dünýä işine çörňeşip, hapalanmazlyk hiç kime başardýan däldir».
Ýedinji mysal
Bu dünýäniň gapysyndan gelen kişiniň mysaly hemişe işi myhmanlar üçin niýetlenen owadan otagynda myhman kabul etmek bolan öý eýesiniň ýanyna myhman bolup gelen adama meňzeýär. Ol öý eýesi myhmanlary topar-topar edip, öz öýüne çagyrýar. Soňra altyndan we göwherden doly tylla tabagy we içinde hoşboý ysly ud hem bohur[1] bolan kümüş mejmeri[2] olaryň öňünde goýýar. Bu topardaky adamlar tabagy we mejmeri indiki geljek topar üçin, öz ýerinde goýýarlar. Diýmek, öý eýesiniň däbini bilýän we akyly ýerinde bolan adamlar udy we bohury oduň üstünde goýýarlar, hoşboý ysdan lezzet alýarlar. Tabak bilen mejmeri hoşallyk bilen ýerinde goýýarlar we öý eýesine minnetdarlyk bildirip, turup gidýärler.
Akmak we nadan kişi bolsa bu tabak bilen mejmeri gaýdanda ýany bilen alyp gaýtmak üçin, özüne berlendir öýder we gaýdan wagty, bu gaplary alyp galjak bolsalar, ol gynançdan ýaňa, dady-perýat edip bagyrar. Bu dünýä ötegçiler üçin bir ýoldur. Olar bu ýolda ahyret azyklaryny gazanmalydyrlar, ýöne bu ýerdäki baýlyklara göz gyzdyrmaly däldirler.
Sekizinji mysal
Bu dünýä adamlarynyň mysaly, ýagny olaryň dünýä işlerine başagaý bolup, ahyretlerini ýatdan çykaryşlary, gämide sapara giden bir kowumyň mysalyny ýatladýar. Gämide barýan bu kowum Jezirä ýetenlerinde, aýak ýoly we täret kylmak üçin, gämiden düşýärler. Gämiçi olara ýüzlenip: «Hiç kim täretden we namazdan başga zat bilen güýmenip, köp eglenmesin. Gämi tiz ugrajakdyr» diýip jar çekýär.
Soňra olar Jezirede çar ýana pytraýarlar. Akylly topar ýeňil täret alyp, derrew yzlaryna dolanyp gelýärler. Gelseler, gämi boş. Olar oňat we göwnejaý ýerden orun alýarlar.
Beýleki topar Jeziräniň geň-ajaýyp ýerinde galyp, oňa täzeden syn etmäge durýarlar. Ol ýerdäki owadan gülleri, hoş owazly guşlary, dürli reňkli we nagyşlanan ownuk daşlary synlap, ep-esli wagt aňk bolup durýarlar. Olar dolanyp gelenlerinde, gämide giň ýer tapman, darajyk we garaňky ýerde oturýarlar we eden hereketleriniň ejirini çekmeli bolýarlar.
Üçünji topar ol ýerdäki geň-enaýy zatlary synlamak bilen kanagat etmeýärler. Olar şol ownuk daşlary çöpläp, öz ýanlary bilen alyp gelýärler. Gelseler, gämide arkaýyn oturar ýaly ýer tapman, bir darajyk ýerde gyslyşyp oturýarlar, ýüklerini bolsa gerdenlerinde goýýarlar.
Iki günden soň, bu ownuk daşlaryň reňki üýtgäp, garalyp ugraýar we ondan erbet ys aňkap başlaýar. Olar daşlara ýer tapman, zyňmaly bolýarlar we muňa köp puşman edýärler. Çünki, olar biderek ýüküň agramyny we ejirini gerdenlerinde çekmeli bolýarlar.
Beýleki bir topar Jeziräniň täsinliklerine geň hem haýran galyp, gämiden uzaklaşýarlar we gämi ugraýança şolara tomaşa edýärler. Gämiçiniň jar çekmesini hem eşitmeýärler. Şeýlelikde, Jezirede galýarlar. Olaryň birnäçesi açlykdan, ýene birnäçesi ýyrtyjy hem ýabany haýwanlaryň ellerinden heläk bolýarlar.
Ine, şu görşümiz ýaly, birinji topar dünýäden heder edýän möminleriň mysalydyr. Olar ýaşamak üçin zerur bolan ujypsyzja zatlar bilen kanagat edýärler. Ahyrky topar Hudaýy we ahyreti ýatdan çykarýan kapyrlaryň mysalydyr. Olaryň hemmesi bu dünýäniň aldaw toruna düşdüler. «Bu dünýäni ahyretden hem gowy görüp, oňa bil baglanlar ....»[3] Ortaky iki topar günäkärleriň mysalynda bolup, olar iman aslyny saklasalar-da, dünýäden el çekmediklerdir.
Bir topar adamlar derwüşlikden, terkidünýälikden lezzet alýarlar, ýene bir toparlary dürli nygmatlary toplamakdan lezzet alýarlar. Ine, şeýdibem, öz ýüklerini agraldýarlar.
Dokuzynjy mysal
Abu Hüreýre şeýle rowaýat aýdýar:
«Bir gün pygamber (oňa Allanyň salamy bolsun!) maňa şeýle diýdi:
– Eý, Abu Hüreýre, eger isleseň, dünýäni we dünýädäki bar bolan zatlary saňa görkezeýin.
Men:
– Görkez, eý, Allanyň ilçisi! – diýdim.
Soňra ol elimden tutup, meni bir üýşmek bolup ýatan dersiň ýanyna alyp gitdi. Ol ýerde adamlaryň üýşmek bolup ýatan zyňylan kelleleri bar eken. Ol kellelerden diňe çüýrän süňkler galypdyr. Köne ýyrtyk-ýirik hyrkalar adam nejasatlarynyň arasynda dargaşyp ýatyrdy. Soňra pygamber aýtdy:
– Eý, Abu Hüreýre, seniň bu görýän kelleleriň hemmesi siz ýaly adamlaryň kelleleridi. Bu kelleleriň hemmesi arzuw-hyýaldan, harsydünýälikden püre-pürdi. Şeýle-de, edil siziň ýaly uzak ýaşamagy arzuw edipdiler. Ymaratlar gurmaga, mal-baýlyk toplamaga çalşypdylar. Bu gün bolsa olar seniň görüp durşuň ýaly, ýalaňaç süňkler bolup galdylar. Bu ýyrtyk hyrkalar olaryň bezenip, beslenen wagtlarynda, eginlerine geýen eşikleri. Häzir köwsarlaýan ýel olary tozadyp, nejasatyň içine aýlap urýar. Bu ýatanlar olaryň ýükçüleri bolup hyzmat eden atlaryň, düeleriň, ýabylaryň we beýleki mallaryň süňkleri. Bu adamlar bularyň üstüne münüp, bütin älemi aýlanypdylar. Bu nejasatlar olaryň aldaw-hile bilen ele salan we biri-birinden ogurlyk edip alan ýakymly tagamlarydy. Ine, şeýdibem, olar özlerinden aňkap duran, ysyndan ýaňa hiç kimiň golaýynda durup bilmeýän şunuň ýaly ryswaçylygy galdyrdylar. Diýmek, dünýäniň ahwalynyň hemmesi, ine, seniň şu görşüň ýaly. Eger her kim bu dünýäniň agysyna aglasa, ol ýerliklidir.
Bu gürrüňlerden soňra Abu Hüreýre ellerini ýüzüne tutup aglady. Muny görüp, ol ýerdäki sahabalaryň hem hemmesi möňňürip aglamaga başladylar we edil şu ýeriň özünde bu dünýeden ýüz öwürdiler».
Onunjy mysal
Bu dünýäniň keşbini ýene bir mysalda görmek bolar.
Isa pygamberiň (Alla onuň ruhuny şat etsin!) döwründe üç sany adam ýol bilen barýar eken. Olar bir hazynanyň üstünden barypdyrlar. Ýoldaşlaryň her biri baýlyga eýe bolmak üçin, öz ýanyndan beýleki ýoldaşyny heläk etmeklik niýetine münüpdirler. Şu bet niýet bilen olar: «Birimiz gidip, iýer-içer ýaly bir zat getireli» diýşip hile gurnapdyrlar. Soňra ýoldaşlaryň ikisi galyp, beýleki birini iýer-içer ýaly zat getirmek üçin ugradypdyrlar. Ol kişi gidip, tagam satyn alypdyr. Ol öz ýanyndan: «Ol ikisi iýip öler ýaly, men bu tagama zäher goşaýyn, onsoň hazyna öz-özünden meniň elime geçer» diýip, göwün ýüwürdipdir we şu niýet bilen hem tagama zäher goşupdyr. Yzda galan beýleki ikisi: «Bu adam öwrülip gelende, getiren tagamyny alaly-da, özüni öldüreli. Şeýlelikde, hazyna biziň ikimiziňki bolar» diýip dilleşipdirler. Giden kişi zäherli tagam bilen dolanyp gelende, ýaňky ikisi ony öldüripdirler. Onuň getiren tagamyny iýensoňlar, sähel salymdan bularyň ikisi-de ölüpdir. Şeýlelikde, hazyna öňküsi ýaly, öz ýerinde galypdyr. Tötänlikden ol ýerden geçende, bu läş bolup ýatanlara Isa pygamberiň gözi düşüpdir. Ol öz yzyna eýerijilerine garap: «Ine, dünýe! Bularyň üçüsinem nähili heläk edendigine bir syn ediň. Onuň özi bularyň üçüsindenem galandyr. Ol üç kişi dünýäniň şumlugy zerarly ölüp gitdiler. Dat, dünýäni dünýeden gözleýänleriň gününe!».
Ikinji çeşme – soňky demiň barada pikir etmekdir
Bilgin! Adamlar iki topar bolýandyrlar. Olaryň birinjisi – dünýäniň hal-ýagdaýyna, wagtyna, ýagny dünýäniň bir ötegçidigine üns bermeýän, diňe uzak ýaşamagyň arzuwy bilen ýatyp-turýan kişilerdir. Olar näme isleseler, şony etmek bilen göwünlerini kanagatlandyrýarlar, hiç haçan soňky demlerini ýada salmaýarlar, ol hakda pikir-alada hem etmeýärler. Bular barypýatan akmak kişilerdir.
Ikinjisi – bu dünýäde nähili bolmalydygy, imanyňy o dünýä nähili sag-salamat eltmelidigi, bu dünýäden özüň bilen nämeleri äkidip bolýandygy, nämeleri äkidip bolmaýandygy barada oýlanyp, hemişe özleriniň soňky demleriniň aladasy bilen ýatyp-turýan akylly adamlardyr. Bular barada pikir etmek ähli adamlara wajypdyr. Bu esasanam, elpe-şelpelik, bolelinlik üpjünçiligi hemmeleriňkiden artyk bolan soltanlara, patyşalara we welaýat eýelerine has-da wajypdyr. Olarda san-sajaksyz mülk, ekerançylyk ýerleri, saraýlar, düşekler, gulamlar, kenizekler, atlar, goýun-guzylar we şuňa meňzeşler bardyr. Bular ahyrete golaýlaşdyrýan soňky demlerinde bu zutlaryň ählisi bilen hoşlaşyp, öz ýanlary bilen diňe bu dünýede eden ýagşy amallaryny äkidip bilerler.
Beýikligi beýgelmiş Belent Allatagalanyň ýanynda bir gulam bardyr. Onuň ady Ezraýyldyr. Hiç bir ýaradylan ondan sypyp bilmez. Para-peşgeş, mertebe-dereje, hormat-sylag, rehim-şepagat ýaly zatlar hiç bir kişiniň saraýdyr öýüniň gapysyndan yzyna dönüp gaýtmaz, baran ýerinde ýer alar. Patyşanyň ähli emeldarlary, wezir-wekilleri öz haklary ýa-da para hökmünde altyn-kümüş we iýip-içer ýaly zatlary alarlar, emma bu wekil, ilçi jandan başga hiç zat almaz. Ähli wekillerden şepagat dileseň ýa-da haýyş etseň, peýdasy deger, emma bu ilçiniň ýaňky zatlara hiç hili nepi degmez. Ähli wekiller bir gün, bir sagat möhlet bererler, emma bu ilçi ýekeje dem hem möhlet bermez. Onuň geň-ajaýyp häsiýetleri örän köpdür. Biz onuň geň-taň hal-ahwallaryny düşündirmek üçin, bäş sany hekaýaty aýdyp bereris.
Birinji hekaýat
Bu hekaýat jöhitleriň ulamasy, soňra musulman bolan Wähäb ibn Monebbä degişli. Ol şeýle rowaýat aýdýar:
«Beýik patyşalaryň hatarynda bolan bir patyşa bolupdy. Ol bir gün özüniň patyşalygyny hem beýikligini halka göz, äleme jar etmek üçin, dabaraly hem haýbatly ýagdaýda atyna atlanmak we ähli emirlerini, leşger ýolbaşçylaryny hem özi bilen atlandyrmak isledi. Soňra özüne gymmatbaha, haýbatly eşikleri getirmeklerini buýurdy. Göze gelüwli, aňrybaşy owadan eşikleri alyp geldiler. Geýdi. Başga hiç ýerde tapylgysyz meşhur atlary, oňat ýük ulaglaryny onuň ýanyna idip getirdiler. Ol ähli ýarag-esbap bilen kämil üpjün edilen, bili jöwherler bilen bezelen sap zer çekili bir belli aty saýlady. Soňra atyň üstüne mündi. Ol leşgeriň ortarasynda uly haýbat bilen atyny sürüp barýardy. Şol wagt bir ýerden Iblis peýda boldy. Ol agzyny onuň burnunyň üstüne goýdy. Patyşa burnunda öwüsýän gopbamsylyk ýeliniň meçewi bilen öz ýanyndan: «Jahanda meniň ýaly kim barka?!» diýýärdi. Şeýle badyhowalyk bilen ýeli murtunda ýykyp, atyny säpjedip barýardy. Tekepbirlikden we ulumsylykdan ýaňa, hiç kimiň ýüzüne-de seretmeýärdi. Şol wagt egni köne-küşül, hapa eşikli bir adam öňüni kesip, oňa salam berdi. Patyşa göwnüýetmezlik edip, oňa jogap gaýtarmady. Ol adam elini uzatdy-da, onuň atynyň uýanyny tutdy. Patyşa:
– Eliňi çek, sen at uýanyny tutar ýaly kim bolupsyň?! – diýip gygyrdy.
Derwüş adam:
– Meniň saňa bir hajatym bar – diýdi.
Patyşa:
– Atdan düşýänçäm sabyr et – diýdi.
Ol:
– Edil şu wagtyň özünde isleýän – diýdi.
Patyşa:
– Näme üçindigini aýt – diýdi.
Ol:
– Bu bir syr. Muny seniň gulagyňdan başga ýere aýdyp bilmerin – diýdi.
Patyşa:
– Aýt – diýdi.
Ol kellesini patyşanyň gulagynyň ýanyna ýetirip, ýuwaşjadan:
– Men ajal perişdesi. Seniň janyňy almak üçin geldim – diýdi.
Patyşa bu sözleri eşidenden, sandyrap gitdi. Soňra:
– Öýüme baryp, aýalym, çagalarym bilen hoşlaşar ýaly, maňa bir möhlet ber – diýdi.
Ol:
– Ýok, sen indi hiç haçan öýüňi, aýalyňy we çagalaryňy görmersiň. Seniň ömrüň sanalgysy gutardy – diýdi-de, onuň ýanyna bardy. Atyň üstünde onuň janyny aldy. Ol ýykyldy we jan berdi. (Eý, Allam! Yslam patyşasyny nägehan (duýdansyz pursatdaky) ölümden Özüň goraweri!)
Leşgerden gykylyk-galmagal gopdy. Gulamlar ol derwüşiň üstüne gygyrmaga başladylar. Ezraýyl bolsa eýýäm ol ýerden gaýyp bolupdy.
Soňra Ezraýyl ol ýerden seniň Hudaýyňyň halan bendelerinden bolan bir dostunyň ýanyna geldi. Oňa salam berdi. Ol güler ýüz bilen onuň jogabyny berdi. Ezraýyl oňa:
– Meniň saňa bir syrym bar – diýdi.
Ol:
– Gulagym sende, aýdyber – diýdi.
Ezraýyl onuň gulagyna:
– Men ölüm perişdesidirin – diýdi.
Ol:
– Salam! Hudaýa şükür! Seniň gelmegiňe köp garaşdym. Uzak wagtlap ýitirim bolduň. Seniň kimin dostuň huzuryna gowuşmak üçin intizar bolşum ýaly, hiç haçan hiç kimiň ýoluna beýle intizar nazarymy diken däldirin – diýdi.
Ezraýyl:
– Häzir näme hajatyň we pişäň bar bolsa aýt – diýdi.
Ol:
– Meniň Allatagalanyň didaryny islemekden başga hiç hili kärim hem, pişäm hem ýok – diýdi.
Ezraýyl:
– Sen janyňy nähili edip almagymy isleýäň? Maňa janyňy seniň öz isleýşiň ýaly almagy buýurdylar – diýdi.
Ol:
– Beýle bolsa, täret kylyp, namaza durýançam garaş. Sejde üçin başymy goýanymda, janymy al – diýdi.
Ezraýyl edil aýdyşy ýaly edip, ony Allanyň rehmetine gowşurdy».
Ikinji hekaýat
Köp mal-baýlyk düýrüp, ýygşyran bir adam hakda şeýle hekaýat aýdýarlar:
«Ol adam rahat oturmak, gowy iýip-içmek, arkaýyn ýaşamak üçin, Allatagalanyň dünýedäki döreden zerur zatlarynyň ähli görnüşini edinmek isläpdir. Soňra bu nygmatlaryň hemmesini toplapdyr. Ol bir belent, şa tagtly, kaşaň köşk gurdurypdyr. Oňa iki sany mäkäm derweze goýdurypdyr. Çakgan gulamlary oňa gözegçi edip belläpdir.
Bir gün ol hyzmatkärlerine süýji tagam taýýarlamaklygy buýrupdyr. Soňra öz nökerlerini we kowumyny öz öňünde nahar iýmek üçin çagyrypdyr. Özi kürsüsine geçip oturdy. Nökerlerinden we ýakynlaryndan bolan birgiden adamlar gelip, saçak başynda jaýlaşdylar hem-de süýji tagamlardan iýmäge başladylar. Şol wagt ýaňky adam tirsegine söýenip, öz-özi bilen gürleşdi:
– Dünýä nygmatlarynyň hemmesini topladym. Indi bolsa rahatlyk hem arkaýynlyk bilen hezil edip iýip-içip, dünýäniň hözirini görüp otyryn!
Ol heniz şu pikirinden el çekmänkä, nan dileýän derwüş sypatyndaky sal-sal eşikli, boýnundan bir torba asylgy bir adam köşgüň daşyndan geldi. Ol köşgüň gapysynyň daşynda pyrlandy. Onuň derwezäni batly hem haýbatly kakyşyndan, köşk yranyp, tagt ýerinden gozganyp gitdi. Ähli adamlar sandyrap başladylar. Habaryny sorasalar, derwüş sypatly adam bulardan bir bölejik nan diledi. Gulamlaryň we derwezebanlaryň hemmesi ýerlerinden böküp turdular-da, onuň üstüne gygyrmaga başladylar:
– Bu nähili samsyklykdyr, eý, gymmat janly derwüş. Naharymyzy iýýänçäk, biraz sabyr et. Soňra saňa-da iýer ýaly galan-gaçanlaryny bereris.
Ol adam aýtdy:
– Baryň-da, hojaýynyňyza aýdyň. Goý, ol daşary çyksyn. Meniň onuň bilen bir wajyp işim bar.
Olar aýtdylar:
– Şu ýerden garaňy saýla, eý, gedaý! Hojaýynymyzy ýanyňa çagyrar ýaly, sen kimmişiň, niräň itimişiň?
Ol adam aýtdy:
– Siz oňa aýdyň! Meniň ýanyma gelmekden boýun gaçyrar ýaly, ol kimmişin?
Olar baryp, bu habary ýetirenlerinde, ol adam olara:
– Näme üçin onuň üstüne gygyrmadyňyz? Näme üçin ony kemsitmediňiz? – diýdi.
Derwüş ýene bir gezek derwezäniň agzyna gelip, öňki gezekkiden hem batly haýbat bilen derwezäni kakdy. Bu sese hemmeler ýerlerinden böküp, ör turdular. Soňra gulamlar taýakmydyr, ýaragmydyr – ellerine ilen zatlar bilen oňa tarap okduryldylar. Ahyry derwüş gaty ses bilen olaryň üstüne gygyryp:
– Biraz köşeşiň, men Ezraýyldyryn – diýdi.
Adamlar bu sözi eşidenlerinden, el-aýaklaryny ýitirip, sandyramaga başladylar, dilleri gürlemekden galdy.
Soňra olar bu ýagdaýy öz hojaýynlaryna habar berip, oňa:
– Ezraýyl saňa bu düýrüp-ýygşyran mal-baýlyklaryňy näme etmekçi bolsaň et. Indi seniň gitmeli wagtyň boldy diýýär – diýip aýtdylar.
Ol adam aýtdy:
– Goý, ol meniň deregime başga birini alsyn!
Bu habary Ezraýyla aýtdylar. Ezraýyl aýtdy:
– Ýok, almaryn. Men diňe seniň üçin, seniň düýren bu baýlyklaryňyň hemmesini senden jyda düşürmek üçin geldim.
Ol adam janyna dert bolan ähli mal-baýlygyny orta üýşürdi. Dünýäniň derdi-hasratyndan ýaňa, ah çekdi we uludan dem alyp, şeýle diýdi:
– Eý, mal-baýlyk, saňa Hudaýyň näleti bolsun! Sen meniň gözlerimi gapdyň. Allatagala ybadat etmeklikden sakladyň. Sen meni ele almak we perýada ýetirmek islän ekeniň. Bu gün bela hem hasrat bolup başymdan indiň. Men indi elim boşja, gury gitmeli boldum. Sen meniň duşmanym bolup galdyň.
Soňra Beýik Allatagala onuň bilen gürleşmek üçin, baýlyga dil berdi. Baýlyk ol adama garap, şeýle diýdi:
– Sen maňa aýdan gargyşlaryňy özüňe-de aýt. Seniň Hudaýyň meni-de, seni-de toprakdan ýaratdy. «Seni o dünýäde ele alýançam, ahyret ýolundaky borjuňy gazanarsyň, derwüşlere zekat, sadaka berersiň, metjit, köpri, saraýlar gurmaga sarp edersiň» diýip, meni seniň eliňe berdi. Sen bolsa meni gorap sakladyň. Aram-aram bet pygyllaryň üçin peýdalandyň. Şu günki günde bizi duşmanlaryňa öwürmek üçin, pis işlere bulaşdyň. Sen bizi hasrata we günä işlere iteklediň. Ýogsa, meniň ne günäm bardy?
Soňra nan iýip ýetişmänkä, Ezraýyl ol adamyň janyny aldy. Ol kürsüsinden başaşak ýykyldy we jan berdi.
Seniň Hudaýyň yslam patyşasyny il içinde ýagşy at-abraýly edip, mertebe-derejesini beýgeltsin we patyşalygyny dowamly etsin!
Üçünji hekaýat
Ýezit Rakkaşy şeýle hekaýat aýdýar:
«Ysraýyl ogullarynda belli zalymlardan bolan bir sütemkär bolupdy. Ol bir gün patyşalyk tagtynda otyrka, saraýynyň gapysyndan haýbatly we gorkunç sypatly bir kişiniň girendigini gördi. Ol gorkudan hem ürküden ýaňa, böküp ýerinden turdy we ondan:
– Meniň öýüme rugsatsyz girer ýaly, sen kimsiň? – diýip sorady.
Ol:
– Meni hiç bir hajyp saklap bilmez. Öýünde bolmak üçin, men hiç bir patyşadan hiç hili rugsatdyr görkezme islämok. Hiç bir patyşanyň ölüminden çekinemok. Hiç bir boýun towlaýjy zalym meniň elimden sypyp bilmez – diýdi.
Bulary eşidenden, ýaňky adam lerzana gelip, onuň aýagyna ýykyldy. Endamy sandyrap başlady we ondan:
– Sen Ezraýylmy? – diýip sorady.
Ezraýyl:
– Hawa – diýdi.
Ol:
– Hudaýyň haky üçin, bir gün möhlet berseň, men toba edeýin we ötünç diläýin! Hazynamda goýan mal-baýlyklary eýelerine gaýtaryp bereýin – diýdi.
Ezraýyl:
– Beýle möhlet berip bilmerin. Çünki, seniň bu dünýedäki ýaşamaly günleriň sanalgydy. Ondan hiç zat galmady – diýdi.
Ol:
– Onda bir sagat möhlet ber – diýdi.
Ezraýyl:
– Ýaşamaly sagadyňam sanalan. Olaryň hemmesi geçip gitdi. Sen olardan gapyl bolduň. Indi hiç sagadam, hiç bir demem galan däldir – diýdi.
Ol:
– Häzir sen meniň ýanyma näme isleg bilen geldiň, meni o dünýä äkitjekmi? – diýdi.
Ezraýyl:
– Seniň eden işiňden başga hiç zat alnyňa gelmez – diýdi.
Ol:
– Men bu dünýede hiç hili ýagşy iş etmändim – diýdi.
Ezraýyl:
– Onda sen Allanyň gazabyna duçar bolarsyň, jaýyň bolsa dowzah bolar – diýdi-de, onuň janyny aldy. Ol diňarkan gaýtdy. Köşkde gykylyk-gopgun turdy. Eger adamlar oňa o dünýäde näme ediljegini, nämäniň garaşýandygyny bilen bolsadylar, onda ahy-nalalaryny has hem artdyrardylar».
Dördünji hekaýat
Şeýle rowaýat aýdýarlar:
«Bir gün jan alyjy Ezraýyl Süleýman ibn Dawudyň (oňa Allanyň salamy bolsun!) ýanyna gelýär. Ol onuň ýakynlaryndan we gulamlaryndan bolan bir kişiniň ýüzüne haýbat bilen ýiti-ýiti seredýär-de, çykyp gidýär. Ezraýyl gidenden soň, gulam Süleýmana ýüzlenip:
– Eý, Allanyň ilçisi! Meniň ýüzüme ýiti çiňerilip sereden kişi kimkä? – diýip soraýar.
Ol:
– Ezraýyl – diýip, jogap gaýtarýar.
Gulam:
– Maňa şeýle bir içgin seredişinden, «ol meniň janymy almaga gelendir» diýip gorkýan. Sen meni şu sagadyň özünde onuň elinden halas etsene! – diýip ýalbarýar.
Pygamber:
– Men seni nädip halas edeýin? – diýýär.
Gulam:
– Ol meni gaýdyp tapmaz ýaly, sen ýele meni edil şu sagadyň özünde Hindistan topragyna äkitmegi buýur – diýýär.
Süleýman ýele ony edil şu wagtyň, şu pursatyň özünde Hindistana eltmegi buýurýar.
Soňra Ezraýyl ýene-de Süleýmanyň ýanyna dolanyp gelýär. Süleýman ondan:
– Ne sebäpden pylan kişiniň ýüzüne gaty siňe-siňe seretdiňiz? – diýip soraýar.
Onda Ezraýyl:
– Geň galyp seretdim. Maňa onuň janyny Hindistan topragynda almaklyk barada seniň Hudaýyňdan perman boldy. Ol Hindistandan uzakda bolupdy. Soňra men tötänlikden Hindistana gitdim we ony şol ýerden tapyp, janyny aldym – diýýär».
Bäşinji hekaýat
Şeýle rowaýat edýärler:
«Zülkarneýn Isgender Rumy dünýäniň şaý-esbabyndan hiç hili zady bolmadyk bir kowuma duşupdyr. Olaryň gabyrlary edil gapylarynyň agzynda bolupdyr. Her haýsy özi üçin aýratyn bir gör gazyp goýan eken. Her gün görleriň ýanyna baryp, bütin gün şol görleriň arasynda zyýarat we ybadat eder ekenler. Aýda ýekeje gün agyzlaryny açyp, galan günlerde roza tutupdyrlar. Olaryň gök otdan başga hiç hili naharlary, iýmitleri bolmandyr. Uýat ýerleriniň örtükleri hem gök otdan eken. Zülkarneýn ýanlaryna baryp, olaryň hal-ahwallaryna syn edipdir. Ýaşaýyşlaryna gaty geň galypdyr. Soňra Zülkarneýn bir adam iberip, olaryň patyşasyny öz ýanyna çagyrypdyr, emma ol gelmändir. Patyşa: «Ýanyna barar ýaly, meniň oňa hiç hili zerurlygym ýa-da mätäçligim ýok» diýipdir.
Soňra Zülkarneýniň özi onuň ýanyna gidipdir we patyşa garap, şeýle diýipdir:
– Men sizde altyndan, kümüşden, dünýä nygmatlaryndan hiç zat görmeýärin, hiç hili mal-baýlyk ýygnamaýarsyňyz, hiç zadyňyz hem ýok. Allatagalanyň ýaşaýyş üçin döreden nygmatlarynyň hiç birisini peýdalanmaýarsyňyz. Munuň sebäbi nämedir?
Patyşa oňa şeýle diýipdir:
– Çünki, hiç kim hiç haçan dünýeden we dünýä nygmatlaryndan doýan däldir.
Zülkarneýn aýdypdyr:
– Öýleriňiziň gapysynyň agzynda gabyrlar gazmagyňyzyň sebäbi nämedir?
Patyşa aýdypdyr:
– Haçanda olara gözümiz düşende, ol gabyrlar kalbymyzda derrew ölüm duýgusyny oýaryp, bize dünýäniň bir sowuk zatdygyny ýatladýar. Onsoň biz Hudaýa ybadat etmäge meşgul bolýarys. Ine, biz bu gabyrlary şu maksat bilen gazdyk.
Zülkarneýn aýdypdyr:
– Ot iýmegiňiziň sebäbi nämedir?
Patyşa aýdypdyr:
– Öz garnymyzy janly-jandarlaryň gabry etmegi ýigrenýänligimiz üçin. Çünki, tagamyň lezzeti bokurdaga barýançadyr.
Soňra ol elini uzatdy-da, bir adamyň kelleçanagyny alyp, Zülkarneýniň öňünde goýdy we oňa garap, şeýle diýdi:
– Eý, Zülkarneýn! Sen munuň kimiň kellesidigini bilýärmiň?
Zülkarneýn:
– Aýt, eşideli! – diýdi.
Ol aýtdy:
– Bu dünýä patyşalaryndan bolan bir patyşady. Ol zulum etmek, dünýä baýlygyny ýygyp-düýrmek bilen meşgul boldy. Raýatyna agyr jebir-sütemler etdi. Onuň Allanyň bendelerine eden jebir-sütemleri çenden aşyp, ýetjek derejelere ýetdi. Onsoň Beýik hem Belent Allatagala onuň janyny alyp, dowzaha ugratdy. Bu şol patyşanyň kellesi.
Soňra elini uzadyp, başga bir kelleçanagy eline aldy. Ony ortada goýup:
– Munuň kimiň kellesidigini bilýärmiň? – diýdi.
Zülkarneýn:
– Aýt – diýdi.
Ol söze başlady:
– Bu adyl, ýagşy niýetli, ýukaýürek, mähirli patyşalardan bolan bir patyşanyň kellesi. Ol raýatyna adyllyk etdi, rehim-şepagatlylyk bilen garady. Ejizleriň dadyna ýetişip, zalymlaryň temmisini berdi. Dünýeden gaýtmaly wagty, Allatagalanyň Ezraýyl atly ilçisi gelende, ol hiç bir kynçylyksyz, aňsatlyk bilen janyny tabşyrdy. Nesip bolsa, ol Allatagalanyň rehmetine we ýagty behişte gowşar.
Patyşa bulary aýtdy-da, elini Zülkarneýniň kellesiniň üstünde goýup, şeýle diýdi:
– Eý, Zülkarneýn, sen öz kelläň bu ikisinden haýsysy ýaly bolar diýip pikir edýäň? Ajal atly belanyň haçan ýakaňdan tutjakdygyny, imanyň o dünýä sag-salamat gitjekmi ýa-da ýok, ony Alladan başga hiç kim bilýän däldir. Sen şonuň üçin, özüňde gapyllyga ýol berme.
Zülkarneýn ep-esli wagt dymyp durdy. Soňra zar-zar aglap, ony bir gyra çekdi we şeýle diýdi:
– Meniň bilen söhbetdeş bolmaga we meniň wezirligime meýliň barmy? Eger bar bolsa, aýt, men şolar bilen birlikde öz mülkümiň hem ýarysyny saňa bereýin.
Patyşa aýtdy:
– Ýok.
Zülkarneýn aýtdy:
– Näme üçin?
Patyşa aýtdy:
– Çünki, ýygyp-düýren mal-mülküň sebäpli, ähli halk seniň duşmanyňdyr. Derwüşligim we kanagatlylygym üçin bolsa olar meniň dostumdyrlar.
Soňra Zülkarneýin onuň bilen hoşlaşdy. Onuň gürrüňleriniň täsiri bilen ähli mal-mülküni, patyşalygyny terk etdi. Mal-baýlykdan ýüregini sowadyp, buza dönderdi. Şundan soňra özüniň ähli pikirini, güýç-kuwwatyny ahyret azygyny gazanmaklyga gönükdirdi».
Eý, yslam patyşasy! Gapyllykda ýatan adamlar ölüm gürrüňini diňlemegi halamaýarlar. Çünki, olar bu dünýä özleri üçin ýürekgysgynç bir zat bolar diýip gorkýarlar.
Habarda şeýle getirilýär: kim ölüm we gabrystanlyk hakda näçe köp ýatlasa, gabyr onuň üçin behiştiň çemenzarlyklaryndan bolan bir lälezarlyga öwrüler. Eger kim gapyl bolsa we bulary ýatlamasa, onuň gabry dowzah gowaklaryndan bolan bir gowaga öwrüler.
Bir gün pygamberimiz (oňa Allanyň salamy bolsun!) kapyrlaryň urşunda wepat bolan şehitleriň sypatlary hakda gürrüň berýärdi. Şonda Äşe (goý, ondan Alla razy bolsun!) şeýle diýdi:
– Eý, Allanyň ilçisi! Heý, şehit bolman, şehitlik sogabyny gazanyp biljek adam bolarmy?
Pygamber aýtdy:
– Eger kim bir günde ýigrimi gezek öz ölümi hakda ýatlasa, günäleri ýuwlup, sogap gazanar we oňa şehitlik derejesi berler.
Pygamber alaýhyssalam aýtdy: «Ölümiňiz barada köpräk ýatlaň. Şeýtseňiz, günäleriňiz ýuwlar, dünýä babatda ýüregiňiz sowuk we dok bolar».
Pygamber alaýhyssalamdan:
– Iň kiçijik we iň akylly adamlar kimler? – diýip sorapdyrlar.
Ol:
– Ölümi hakda köp ýatlan we onuň gamyny etmek bilen köp meşgul bolanlar – iň kiçi we iň akylly kişilerdir. Olar dünýäniň hormatyna, ahyretiň nygmatyna eýe bolarlar – diýdi.
Eger kim dünýäni edil meniň aýdyşym ýaly tutsa we soňky deme, ölüm hakdaky pikire öz kalbyndan orun berse, dünýäniň işi onuň üçin aňsat bolar. Iman daragty kök urar, şahalary pajarlap başlar. Syrat köprüsinden hiç bir muşakgatsyz, aňsatlyk bilen geçer. Iman şek-şübhesiz sag-salamatlyk bilen Allatagalanyň ýanyna barar. Enşalla!
Alla iň dogry ýola gönükdiriji we ugrukdyryjydyr. Ol öz jeberutynyň[4] dergähine barmak isleýänlere (muşdak bolanlara) ylham we towpyk berijidir. Dünýä zynatlaryndan ýüz öwrüp, oňa bütin süňňüň-durkuň bilen berilmelidir. Din ýolunda yhlas edip, tüýs mynasybyna ybadat edip boýun sunmalydyr. Ondan özge zada gabak galdyrmaly däldir. Din ýoluna öýkünijilere däl-de, päk ýürekli möminleriň edebine (ýoluna) eýermelidir, ynsyň-jynsyň ýagşysy – Muhammet alaýhyssalama eýermelidir. Onuň buýruklaryna tabyn bolup, gadagan eden zatlaryndan saklanmalydyr. Ine, şonda bu zatlar Allanyň huzuryna päk kalp bilen baranlardan başga, ne mal-baýlygyň, ne ogul-gyzyň haýry degýän gününde, size ýeterlik güwälik bolar.