Başy » Magtymguly Pyragynyň goşgulary » GEÇMELİ DÜNÝÄDİR
Eý, ýaranlar, musulmanlar,
Gelip, geçmeli dünýädir.
Gurby ýeten goç ýigitler
Döküp-saçmaly dünýädir.
Hiç kim munda tutmaz orun,
Saglykda döküp-saç baryn,
Munça ýygnap, nätdi Karun,
Taşlap gaçmaly dünýädir.
Bu dünýäniň gamyn iýr sen,
Adam ogly, bil, ölir sen,
Per düşegi gaty diýr sen,
Ýerni guçmaly dünýädir.
Zulum ýagar başlaryňa,
Awy gatar aşlaryňa,
Munda eden işleriňe
Hasap geçmeli dünýädir.
Magtymguly, okyp Kuran,
Hudadan dilegil iman,
Her ýigit ölse binyşan,
Orny öçmeli dünýädir.