Başy » Magtymguly Pyragynyň goşgulary » DUŞSAÑ DERDİ – BELAGA
‘Elif ’, owwal ibtida, hamdyň ýetir hudaga,
‘Bi’, boş ýörme gullukda duşsaň derdi-belaga,
‘Ti’, tur haby-gaflatdan ömrüň gelmiş oraga,
‘Si’, sakar bar, häzir bol, ‘Jim’, jähd eýle ýaraga,
‘Hi’, helmniň haormaty çün rehm et men binowaga.
‘Hy’, hasratly elemni menden özge kim eýlär,
‘Dal’, derdimge dowany senden özge kim eýlär,
‘Zal’, zemreýin-günähe ‘ri’ rehmiň merhem eýlär,
‘Zi’, zor eýlese hyşmyň, küllüsin derhem eýlär,
‘Sin’, säherler bidar et, sal çeşmimni oýaga.
‘Şin’, şowkuna düşgenler, ‘sad’ sabr edip durmazlar,
‘Zad’, zyýaňy aňlanlar, haý, ýörürler, armazlar,
‘Taý’, talaby-didaryň aram-karar kylmazlar,
‘Zaý’, zahyrdyr, ‘aýn’ ylmyň bildirmeseň bilmezler,
‘Gaýn’, gaflat içinde goýma meni pyraga.
‘Fi’, pikiriň kylganga, ‘kaf’ gudratyň bes dälmi,
‘Käp’,- ‘kün!’ diýgen binana, ‘lam’ lemgatyň bes dälmi,
‘Mim’, men magny aňlanga, ‘nun’ nygmatyň bes dälmi,
‘Waw’, waslyňa ýetinçä, ‘hi’ hijretiň bes dälmi,
‘Lam-elip’, ýok ygtybar düneýi-biwepaga.
‘Ýa’, ýalançy dünýäniň pişesi al bilendir,
Alyn görüp guwanma, düýbi zowal bilendir,
Çarhyň işi her zaman bir aýry hal bilendir,
Magtymguly, bir köňlüm ýüz müň hyýal bilendir,
İşim asan etmeseň, döner, ýa, alas-salaga.