Başy » Magtymguly Pyragynyň goşgulary » SAÇDY MUHAMMET
Owwal deslap baryp Haýbar dagynda,
Kapyrlar ganyny saçdy Muhammet.
Leklaherde, Sekwan, Kabil şährinde,
Jepa çekip dini açdy Muhammet.
Aşyklar baş olup, yşka münende,
Tura nazar düşüp, daglar ýananda,
Byrag gökden gelip, ýere inende,
Refref münüp, arşa uçdy Muhammet.
Mikaýyl, Ysrafyl, Ezraýyl bile,
Geldiler, durdylar Jebraýyl bile,
Seýr etdi Selsebil, Zenjebil bile,
Köwser arygyndan içdi Muhammet.
Magrajyñ gijesi seýre baranda,
Ýa Jebraýyl emin bile ýörende,
Behişt gapysynda gelip duranda,
“Bissimilla!” diýp, işik açdy Muhammet.
Magtymguly, özge dini bozdular,
Yklym-yklym, şäher-şäher gezdiler,
Jepa çekip yslam dinin düzdüler,
Altmyş üç ýaşynda geçdi Muhammet.