Başy » Magtymguly Pyragynyň goşgulary » ÖÝLER GÖRER SEN
Panydan bakyýa barmaly bolsañ,
Tüýnüksiz, gapysyz öýler görer sen.
Namaz kylmaý, bigam ýatmaly bolsañ,
Tamug-dowzah atly jaýlar görer sen.
Özüñe dost bilme pany dünýäni,
Ýalançyda gazanmagyn günäni,
Baş atyp, göz gypyp, etme zynany,
Gabyr içinde çygyr, waýlar görer sen.
Namaz bile baş işiñi jaý etgin,
Toprak bile öz köñlüñi taý etgin,
Muhammet zamundyr, şunda waý etgin,
Ajdarha, mar atly möýler görer sen.
Terk eýlemäwergin bäş wagt namazyñ,
Gör içinde egsik bolmaz owazyñ,
Gyşyñ eda bolup, tükenmez ýazyñ,
Aby-köwser atly suwlar görer sen.
Ol iki çeşmiñi gözüñden akdyr,
Ýoldaşyñ imandyr, ýaradan hakdyr,
Menziller yrakdyr, ýollar uzakdyr,
Ýaşmaz günler, batmaz aýlar görer sen.
Bir gün zaýa eýlär asman zemini,
Derýalar gark eder suwda gämini,
İller, beýan etsek ýedi tamugny,
İçinde zekatsyz baýlar görer sen.
Säher turup, tiliñ senalar saña,
Açlara nan berip, ýalañaç-dona,
Rahym ýoldaş etse seni imana,
Behişdiñ içinde toýlar görer sen.
Asly käri gazanyñda, aşyñda,
Perişteler oýluşarlar daşyñda,
Hüýri gyzlar gelip durmuş gaşyñda,
Lagly-jöwahyrdan şaýlar görer sen.
Bende Magtymguly, çagyr Allany,
Azazyl şeýtana berme pelläni,
Nesip etse jennet içre hülläni,
Münseñ, Byrag atly taýlar görer sen.