Başy » Kitaplar » ЗАХЫТЛЫК КИТАБЫ » ДОКУЗЫНҖЫ БӨЛҮМ НАМАЗ ВЕ ГУРХАН ОКАМАК ХАКДА
* * *
Сыла ибн Эшйем шейле диййәр: «Ресулалла айтды: «Ким дүнйә ишлерини ядына салмаздан намаз окаса, соң хем Алладан бир зат дилесе, Алла онуң дилегини кабул эдер».
* * *
Абу Хазым шейле диййәр: «Ресулалла бир ораза айында метҗитде өзүне дегишли гапысында гамышдан эдилен бир чадырда ыгтыкафда отурды. Бир гүн гамшы айрып, келлесини чыкарды. Ол адамлары гөрүп: «Хакыкатдан хем, намаз окаян Ребби билен гизлин гүрлешйәндир. Хер бириңиз Реббиңиз билен нәме гүрлешйәндигине серетсин! Бир бөлегиңиз бейлекиңизе намазда окаян Гурханыны әшгәр окамасын!».
* * *
Укба ибн Амыр Җухени шейле диййәр: «Ресулалланың шейле диендигини эшитдим: «Ким тәрет кылып, соң гафлата дүшмән ве башга зат билен мешгулланман намаз окаса, шол намаздан өңки эден әхли гүнәлери гечилер».
* * *
Муҗахыт Аллатагаланың: «Бош махалың туруп, Реббиңе өврүл»[1] аяты хакда: «Дүнйә ишлеринден бош махалың намаза дур, «Реббиңе өврүл» хакда хем «Ниетиңи ве хөвесиңи Реббиңе тарап өвүр» дийди».
* * *
Ибн Апбас шейле диййәр: «Хузур ичинде окалан орта узынлыкдакы ики рекат намаз калп гапыл болуп, бүтин гиҗе намаз окамакдан хайырлыдыр».
* * *
Хезрети Алыдан Аллатагаланың: «Олар намазларында хушуг ичиндедирлер»[2] аяты хакда соралды. Ол: «Хушуг калпдадыр. Хушуг мусулмана болан гарайшың юмшамагы ве намазда эйләк-бейләк серетмезлигиңдир» дийди.
* * *
Муҗахыт Аллатагаланың: «Олар намазларында хушуг ичиндедир»[3] аяты хакда: «Хушуг херекетсизлик ве гымылдамазлыкдыр» дийди.
* * *
Месрук шейле диййәр: «Абдылла ибн Месгут шейле дийди: «Намазда херекетсиз болуң!».
* * *
Сафван ибн Амр шейле диййәр: «Мухаҗыр Неббалың янында кишиниң саг элини чеп элиниң үстүнде гоймагындан (ягны намазда эл багламагындан) гүррүң этдилер. Ол хем: «Алланың ыззат хузурында песлик гөркезмек, гөр, нәхили гөзел! » дийди.
* * *
Фазл ибн Апбас шейле диййәр: «Ресулалла айтды: «Намаз ики-икидендир. Хер ики рекатдан бир эттехыята отур. Ялбар, хушуга[4] бүрен ве эҗизлигиңи әшгәр эт. Соң ики элиңи аяң йүзүңе гелҗек гөрнүшде Реббиңе: »Эй, Реббим! Эй, Реббим!» дийип галдыр. Ким муны этмесе, ол намаз кемдир, кәмил дәлдир».
* * *
Абдылла ибн Шетдат шейле диййәр: «Бир адам:
— Эй, Алланың илчиси! Эл-эввах кимдир? — дийип сорады.
Пыгамберимиз:
— «Эл-эввах» хушуглы, көп дилег эдйән ве ялбаряндыр — дийип, шу аяты окады: «Хакыкатдан хем, Ыбрайым, элбетде, эл-эввахдыр ве халымдыр»[5].
* * *
Алкама ибн Мерсет билен Ысмайыл ибн Умейе шейле диййәр: «Ресулалла намазындан айрылансоң, ики элини бирлешдирип галдырарды ве шейле диерди: «Эй, Реббим! Эден ишлерими ве хениз этмедиклерими, гизләнлерими ве әшгәр эденлерими, исрип эденлерими ве сениң менден хас говы билйәнлериңи багышла! Өңе гечириҗи ве соңа гоюҗы сенсиң! Хич бир Худай ёкдур, диңе сен барсың! Мүлк сениңкидир. Хамду-сена саңа махсусдыр».
* * *
Абдырахман ибн Мугавыя ибн Худейч шейле диййәр: «Бир адам Ресулалладан:
— Эй, Алланың илчиси! Маңа харам эдилен затлардан кәбирини нәме халал эдип билер? — дийип сорады.
Пыгамберимиз дымды. Ол адам сорагыны үч гезек гайталады. Пыгамберимиз хер гезек дымды, соң болса:
— Яңкы сорагы соран ниреде? — дийди.
Ол адам:
— Мен бәрде, эй, Алланың илчиси! — дийди.
Пыгамберимиз бармагы билен ере уруп:
— Калбың кабул этмедигини ташла! — дийди».
* * *
Абу Зер шейле диййәр: «Пыгамбер алайхыссалам айтды: «Бириңиз намаза дуран махалыңызда хөкман Алланың рехмети оны гаршы аляндыр диймекдир. Шонуң үчин хем ол намаз окаян ериндәки чагыллары ойнап дурмасын!».
* * *
Абу Зер шейле диййәр: «Пыгамбер алайхыссалам айтды: «Гул намазда махалы, йүзүни башга ере өвүрмесе, Аллатагала оңа йөнелмегини довам эдер. Ол йүзүни башга ере өвүрсе, Аллатагала хем ондан йүзүни өврер».
* * *
Абдылла ибн Месгут шейле диййәр: «Гулы намазда махалы гөзүни башга ере өвүрмесе, Аллатагала оңа йөнелмегини довам эдер».
Бу хадысың равысы Мухаммет ибн Ыбрайым шуны хем үстүне гошды: «Бу хадысы маңа роваят эден адам намаза дуран махалы, сүтүн ялы дим-дик дурарды».
* * *
Магмер бир адамдан шейле роваят эдйәр: «Сагыт ибн Мусейеп намазда вагты бош херекетлери эдйән бир адамы гөрүп, шейле дийди: «Эгер бу адамың калбы хушуг ичинде болсады, агзалары хем хушуг ичинде боларды».
* * *
Езит ибн Абу Хабып шейле диййәр: «Абул-Хайыр шейле дийди: «Укба ибн Амыр Җухениден Аллатагаланың: «Олар намазларында гайымдырлар»[6] аяты хакда:
— „Олар мыдама намаз окаянлармы? — дийип сорадык.
Ол:
— Ёк, диңе намаз окаман, сагына, чепине ве аркасына назарыны өвүрмейәнлердир — дийди».
* * *
Хасан Басры шейле диййәр: «Ресулалла шейле дийди: «Бәш вагт намаз терези ялыдыр. Ким оны долы биркемсиз берҗай этсе, онуң хакыны долы алар».
* * *
Ибн Абул-Хузейл шейле диййәр: «Абу Амр Абдының амалының кәмиллигинден гүррүң эдердилер. Ондан намазда гөзи сага-чепе өвүрмек барада сорапды. Ол хем: «Ол сениң өлчегиңдир. Исле хакыны оңа долы бер, исле-де ногсан эт» дийди».
* * *
Селман Парсы шейле диййәр: «Намаз өлчегдир. Ким онуң хакыны берип, кем этмесе, оңа хем хакы долы берлер. Ким намазың хакыны ногсан эдип ерине етирсе, Аллатагаланың «өлчегде ногсанлык эденлер хакда»[7] нәме диендигини билйәнсиңиз».
* * *
Абу Җемре Зубагы шейле диййәр: «Мен Ибн Апбаса:
— Мен окамакда ве гүрлемекде ховлукмачлык эдйән — дийдим.
Онда ол:
— Мениң «Бакара» сүресини тертил[8] гөрнүшде окамагым, бүтин Гурханы окамагымдан говудыр — дийди.
* * *
Зейт ибн Сабытда «Гурханы еди гүнде окамак» барада соралды. Ол хем шейле дийди: «Мениң оны йигрими гүнде я-да ярым айда окамагым оны еди гүнде окамагым оңатдыр. Менден «Нәме үчин!» дийип сора. Чүнки, мен онуң үстүнде дуруп, манысы барада ойланарын».
* * *
Ягла ибн Мумеллек Үмми Селеме энемизден Ресулалланың Гурхан окайшы ве гиҗе намазы барада сорады. Ол шейле дийди: «Сизиң билен онуң намазының арасында нәхили меңзешлик бар? Ол намаз окап, соң шонча хем ятярды. Соң уклан вагтының мөчберинде намаз окаярды. Соң ене шонча ятярды. Тә сәхере чыкянча шейле довам эдйәрди».
Соңра онуң Гурхан окайшы барада гүррүң берди. Ол онуң окайшының харплап, дүшнүкли гөрнүшде окаяндыгыны айдярды.
* * *
Мүслим ибн Михрак шейле диййәр: «Хезрети Әшеден:
— Эй, мөминлериң энеси! Кәбир ынсанлар бар, оларың бири Гурханы бир гиҗеде ики я-да үч гезек долы окаяр — дийди.
Онда ол:
— Олар окамаздан окаярлар. Ресулалла бүтин гиҗе намаз окарды. Ол диңе «Бакара», «Әли Ымран» ве «Ниса» сүрелерини окарды. Ичинде бушлук берен аята душ геленде, хөкман Аллатагала дилег-дога эдерди ве ондан өзүне несип этмегини диләрди. Ичинде горкы аятына душ геленде, хөкман Аллатагала дилег эдип, оңа сыгнарды».
* * *
Шагбы шейле диййәр: «Хезрети Әше энемиз Гурханы ховлукмачлык билен окаян бириниң сесини эшидип: «Бу адам не окады, не-де дымды» дийди».
* * *
Шагбы шейле диййәр: «Гурхан окан махалың оны ики гулагыңа етҗек ве калбың дүшүнип билҗек ягдайында ока. Себәби гулак дил билен калбың арасында мынасып бир арабагланышыгы гурар».
* * *
Салам ибн Мисгин шейле диййәр: «Хасан Басрының «Ода атылан хайырлымы я-да кыямат гүни эмин болуп гелен?»[9] аятыны окаяндыгыны эшитдим. Соң ол шейле дийди: «Мухаҗырларың бири бу аяты гайталап-гайталап окаян бир адам барада: «Сиз Аллатагаланың: «Гурханы тертил билен ока»[10] диендигини эшитдиңизми? Ине, бу тертил гөрнүшде окаяр» дийди.
* * *
Хакем ибн Утейбеден бир энсарлы Аллатагаланың «Гурханы тертил билен ока» аяты хакда сорады. Ол хем:
— Тертил юваш-ювашдан окамакдыр — дийип җогап берди.
Соң шейле дийди:
– Мен улы метҗиде агшам билен яссының арасында гидип, Абдылла ибн Магкылың янында отурып, онуң Гурхан окайшыны диңлейәрдим. Ким ондан өвренмек ислесе, өвренип билерди. Ол агшам билен яссы намазының арасында ве өйле билен икинди намазының арасында улы метҗитде намаз окарды. Соң өйүне гелип, өйле укусыны аларды. Соң ене гайдып гелерди. Оңа «Эҗизледиҗи» диййәрдилер. Ынсанлар онуң херекетини гайталаярлар, йөне онуң ызына эерип билмән, эҗизләп тапдан дүшйәрдилер».
* * *
Абдылла ибн Месгудың бир досты айдяр: «Бир гезек метҗиде гелдим. Абдылла ибн Месгут рукугда эглип дурды. Мен «Аграф» сүресини окадым. Ол хенизем рукугдады. Мен «Аграфы» окап гутардым. Ол хениз хем келлесини галдырманды» дийди».
* * *
Фузайыл ибн Амр шейле диййәр: «Мен Ыбрайымың янына гушлук вагты, өйүнде намаз окаярка гелдим. Оңа:
— Эй, Абу Ымран! Сениң достларың бу намазы халамаярлар — дийдим.
Ол хем:
— Мен бир бөлегини гүндиз окарын дийип, гиҗе намазыны долы окаман гүндизе гойярын — дийди».
* * *
Салым какасы Абдылла ибн Омардан роваят эдйәр: «Пыгамбер алайхыссалам айтды: «Хич зада бахылчылык этмек ёкдур, диңе ики зада гөзүң гитмек бардыр:
1. Алланың берен задындан гиҗе-гүндиз хайыр-ыхсан эдйән кишә;
2. Алланың шу Гурханы берен (ягны ят тутмагы несип эден) ве онуң билен гиҗе-гүндиз хузурында намаз окан кишисине».
* * *
Абдылла ибн Амр ибн Ас шейле диййәр: «Бахылчылык диңе ики затда ругсат берлендир:
1. Алланың «Окасын ве ичиндәкилер билен амал этсин» дийип өвреден Гурханы. Нетиҗеде, киши хем «Аллатагаланың оңа берен задыны маңа хем бермегини арзув эдердим» диер.
2. Алланың берен мүлки билен доган-гарындаш зыяратыны эден ве оны ерине сарп эден адам. Нетиҗеде, киши хем: «Аллатагаланың оңа берен задыны маңа-да бермегини арзув эдердим» диер.
Дөрт хәсиет бардыр, олар саңа берлен махалы, дүнйәден йитирен задың саңа зыян бермез:
1. Ягшы хәсиет;
2. Халал ве пәк газанч;
3. Догручыллык;
4. Аманаты берҗай этмек».
* * *
Абдылла ибн Месгут шейле диййәр: «Ресулалла айтды: «Гөзүң гитмеги диңе ики кишә ругсат берлендир:
1. Алланың берен задыны хак ёлунда сарп эдип, ол эмләге эе болан кишә;
2. Аллатагаланың хикмет берип, онуң билен йөрәп, оны башгалара өвреден кишә;
* * *
Хасан Басры Аллатагаланың: «Олар ер йүзүнде песпәллик билен йөрәрлер»[11] диен аяты хакда: «Олар халым[12] кишилердир» дийди.
Ол «Наданлар олар билен давалашансоң, сизе салам болсун» диерлер»[13] аяты хакда болса: «Олара эрбетлик эдилсе, өзлерини юмшак алып барарлар» дийип, үстүне шуны хем гошды: «Оларың гүндиз ынсанларың араларына аралашан махаллары ягдайлары шейледир. Гиҗелери болса гиҗелериң иң хайырлысыдыр. Аллатагала олар барада шейле дийди: «Ол кишилер ики гиҗәни Ребблерине сеҗде эдип, намаз окап гечерлер»[14].
Ине, оларың гиҗелери Ребблериниң хузурына гирен махаллары агзаларының үстүнде нобатма-нобат дынч аларлар. Кә бир аякларына, кә бейлекә даянып, намаз окарлар».
* * *
Алкама ве Эсвет шейле диййәрлер: «Техеҗҗут намазы[15] бираз уклап тураныңдан соңра окаляндыр».
* * *
Хасан Басры Аллатагаланың: «Олар гиҗелерине аз ятянларды»[16] аяты хакда: «Гиҗәниң диңе өрән азыны уклардылар» дийди ве «Сәхерде олар Алладан магпырат диләрлер» [17] аяты хакда болса: «Намазы сәхере ченли узалдарлар, соң хем сәхерде ыстыгфара[18] башларлар» дийди».
* * *
Хасан Басры: «Олар гиҗелерине аз ятянларды»[19] аяты барада: «Олар гиҗә (укусызлыгына) гурсак герердилер» диййәр.
* * *
Сайып ибн Езит шейле диййәр: «Пыгамбер алайхыссаламың янында Шурейх Хадраны барада агзалды. Онда ол: «Ол Гурханы яссык эдинмейән адамдыр» дийди».
* * *
Абдылла ибн Амр ибн Ас шейле диййәр: «Бир гезек Ресулалла маңа: «Эй, Абдылла ибн Амр! Пыланы ялы болма! Ол гиҗе намаз окарды, соң гиҗе намазыны окамагы терк этди» дийди».
* * *
Абу Зер шейле дийди: «Аллатагала шу үч кишини кыямат гүни гүлер йүз билен гаршы алар:
1. Гиҗәниң бир вагты туруп, дүшегини ве йылҗак ёрганыны ташлап тәрет кылан. Тәретини хем говы кылып, намаз окан. Аллатагала перишделерине: „«Бу гулумы бу ише итерен нәме?» дийип сорар. Олар хем: „«Сен хас говы билйәнсиң» диерлер. Аллатагала: „«Мен оны билйәрин. Йөне сиз маңа хабар бериң?» диер. Перишделер хем: „«Сен оны бир затда горкуздың, ол хем горкды. Оңа бир зады умыт этдирдиң, ол хем оңа умыт этди» диерлер. Аллатагала хем: „«Мен сизи шаят тутярын. Мен оны горкян задындан эмин эйледим ве ислейән задыны оңа бермеги ваҗып этдим» диер.
2. Бир газавада гатнашып, душман билен гаршылашан, достлары еңлип, тә өзи өлдүрилйәнчә я-да Алла оңа еңиш несип эдйәнчә гайдувсыз сөвешен киши.
3. Гиҗе достлары билен сыяхат эден ве достлары билен дүшләп, олар уклансоң, еке өзи туруп, намаз окан киши».
* * *
Хасан Басры шейле диййәр: «Маңа шейле хабар берилди: «Гул сеҗдеде махалы укласа, Аллатагала шейле диер: «Гулума середиң! Рухы мениң янымда, бедени болса тагатымда».
* * *
Хумейт ибн Абдырахман шейле диййәр: «Ресулалла айтды: «Парз намазларындан соң иң согаплы намаз техеҗҗут намазыдыр. Ремезан оразасындан соң, иң согаплы ораза Ашыр айының оразасыдыр».
* * *
Җабыр шейле диййәр: «Ресулалла айтды: «Гиҗәниң ичинде бир вагт бардыр, мусулман киши ол замана рас гелип, Алладан бир хайыр ислесе, хайышыны хөкман оңа берер. Бу вагт әхли гиҗелерде хем бардыр».
* * *
Абу Мүслим шейле диййәр: «Абу Зерден:
— Гиҗе намазының иң согаплы вагты хайсы? — дийип сорадым.
Онда Абу Зер:
— Мен хем Ресулалладан сениң сорайшың ялы сорадым. Ол хем: «Гиҗәниң ярымы я-да гиҗәниң ахыры. Оны ерине етирйән аздыр — дийди». Ярысымы я-да ахырыдыгына шек эден равыдыр.
* * *
Ибн Шыхап шейле диййәр: «Ресулалла шейле дийди: «Бир адам гиҗе болсун, гүндиз болсун туруп, говы тәрет кылып, дишлерини мисваклап,[20] соң намаза дурса, бир перишде онуң янына инер. Онуң голайына гелип, агзыны агзына гояр. Онуң окан зады онуң агзындадыр. Эгер дишлерини мисвакламадык болса, инер, йөне агзыны-агзына гоймаз. Ресулалла дишлерини мисвакламаздан намаза дурмазды».
[1] Гурханың 94-нҗи («Инширах») сүресиниң 7-8-нҗи аятлары.
[2] Гурханың 23-нҗи («Мөминин») сүресиниң 2-нҗи аяты.
[3] Гурханың 23-нҗи («Мөминин») сүресиниң 2-нҗи аяты.
[4] Хушуг – калбың ве бедениң икисиниң билеликде горкы ичинде болмагы, дуркуң билен горкмак.
[5] Гурханың 9-нҗы («Тоба») сүресиниң 114-нҗи аяты.
[6] Гурханың 70-нҗи («Магарыч») сүресиниң 23-нҗи аяты.
[7] «Өлчегде ногсанлашдыранлара языклар болсун». Гурханың 84-нҗи («Мутаффифин») сүресиниң 1-нҗи аяты.
[8] Тертил – Гурханың дөрт гөрнүшде окалышының бири. Тертил ховлукман, ербе-ер окаляр.
[9] Гурханың 41-нҗи («Фуссилет») сүресиниң 40-нҗы аяты.
[10] Гурханың 73-нҗи («Музземил») сүресиниң 2-нҗи аяты.
[11] Гурханың 25-нҗи „(«Фуркан») сүресиниң 63-нҗи аяты.
[12] Халым – юмшак, сада, песпәл, юваш.
[13] Гурханың 25-нҗи „(«Фуркан») сүресиниң 63-нҗи аяты.
[14] Гурханың 25-нҗи („«Фуркан») сүресиниң 64-нҗи аяты.
[15] Техеҗҗут намазы – гиҗе окалян намаз.
[16] Гурханың 51-нҗи («Зарият») сүресиниң 17-нҗи аяты.
[17] Гурханың 51-нҗи («Зарият») сүресиниң 18-нҗи аяты.
[18] Ыстыгфар – гүнәң гечилмегини дилемек.
[19] Гурханың 51-нҗи («Зарият») сүресиниң 17-нҗи аяты.
[20] Мисвак – якымлы ыслы агач. Онуң шахасыны диш ювмак, арассаламак үчин уланыпдырлар.