Başy » Kitaplar » ЗАХЫТЛЫК КИТАБЫ
АБДЫЛЛА ИБН МҮБӘРЕК МЕРВЕЗИ
ЗАХЫТЛЫК КИТАБЫ
БИРИНҖИ БӨЛҮМ ЫБАДАТ ЭТМЕК ХАКЫНДА
ИКИНҖИ БӨЛҮМ ЫБАДАТ ҮЧИН ТАГАЛЛА ЭТМЕК ХАКДА
-
ЫБАДАТ БИЛЕН ХОШЛАШҖАКДЫКЛАРЫ СЕБӘПЛИ ӨЛҮМЕ ГЫНАНЯНЛАР ХАКДА
-
АДАМЫҢ ДҮЗЕЛМЕГИ БИЛЕН МАШГАЛАНЫҢ ХЕМ ДОГРЫ ЁЛА ДҮШҖЕКДИГИ ХАКДА
ҮЧҮНҖИ БӨЛҮМ САДЫК[1] ДОСТ-ЯРЛАР БИЛЕН ОТУРЫШМАК ХАКДА
ДӨРДҮНҖИ БӨЛҮМ ДҮНЪЕ МАЛЫНА КОВАЛАШМАЗЛЫК ХАКДА
БӘШИНҖИ БӨЛҮМ КАНАГАТЛЫЛЫК ХАКДА
АЛТЫНҖЫ БӨЛҮМ БИПЕРВАЙЛЫГЫҢ ЯЗГАРЫЛМАГЫ ХАКДА
ЕДИНҖИ БӨЛҮМ АБУ РЕЙХАНА ВЕ БЕЙЛЕКИЛЕР ХАКДА
СЕКИЗИНҖИ БӨЛҮМ АЛЛАНЫҢ ЗИКРИ ХАКДА
ДОКУЗЫНҖЫ БӨЛҮМ НАМАЗ ВЕ ГУРХАН ОКАМАК ХАКДА
ОНУНҖЫ БӨЛҮМ ТАГАТ-ЫБАДАТ ХАКДА
ОН БИРИНҖИ БӨЛҮМ ОРАЗАНЫҢ СОГАБЫ ХАКДА
(Рухы пәклик хакда пәхим-пайхаслар)
МӘХРИБАН ВЕ РЕХИМ-ШЕПАГАТЛЫ
АЛЛАНЫҢ АДЫ БИЛЕН
Даххак ибн Музахым шейле диййәр:[1] «Гурханы ят тутуп, соңра унудан адам, оны диңе бир гүнә иши себәпли унудар. Бу ягдай Аллатагаланың: «(Эй, ынсанлар), сизе бир бела етсе, диңе өз эллериңиз билен эден ишиңиз (гүнәңиз) себәпли етер. Ол көп (гүнәлериң җезасыны бермезден) багышлар»[2] аяты билен кесгитленендир. Гурханы унутмак улы белаларың биридир».
* * *
Сөвбан шейле диййәр: «Пыгамбер алайхыссалам: «Ынсан эден гүнә иши себәпли халал рысгалыны харама өврер» дийди».
* * *
Абу Сагыт шейле диййәр: «Мен эгер ялан сөзлесем, деррев онуң тәсирини өз ишимде гөрйәрин».
* * *
Абу Сагыт ене шейле диййәр: «Бир адам пыгамбер алайхыссаламдан: «Эй, Алланың илчиси! Мен өзүмиң ягдайымың нәхилидигини нәдип билип билерин?» дийип сорады. Пыгамбер алайхыссалам хем оңа: «Эгер сен ахырет ишлеринден бир зады гөзләниңде ол задың саңа еңилдигини, дүнйә ишлеринден бир зады гөзлән махалында болса, ол задың саңа кындыгыны гөрсең, онда билип гой, сен говы ягдайдасың. Эмма эгер сен ахырет ишлеринден бир зат талап эдип гөзләниңде, онуң өзүңе кындыгыны, дүнйә ишлеринден бир зат талап эдип гөзләниңде болса, онуң өзүңе аңсатдыгыны гөрсең, онда сен эрбет ягдайдасың» дийди».
* * *
Абдылла ибн Амр шейле диййәр: «Делилсиз зады ташла. Өзүңе дегишли болмадык зат барада сөз ачма. Пулуңы горап саклайшың ялы, дилиңи хем сакла. Газанан согабыңы-да гора».
* * *
Даххак ибн Музахым Аллатагаланың: «(Хер бир) хош сөз Алла етер. Ол сөзи ягшы амал етирер»[3] аяты хакда: «Ягшы амал хер бир хош сөзи Алла етирйәр» диййәр.
* * *
Хасан Басры шейле диййәр: «Ягшы амал хош сөзи Аллатагала етирер. Эгер сөз хош болуп, амал эрбет болса, сөз амалың дереҗесине ченли песелер. Амал ол кишиниң сөзүнден ёкардадыр».
* * *
Катада шейле диййәр: «Ягшы амал ол хош сөзи Аллатагала етирйәр, ягны Аллатагала ягшы амал эдйәниң согабыны ол хош сөз себәпли артдырар».
[1] Асыл нусгада айдылан сөзлериң ыгтыбарлыдыгыны билдирмек үчин оны илки кимиң айдандыгы, ондан кимиң эшидендиги, онуң хем киме айдандыгы барада айдыҗыларың, роваятчыларың тутуш зынҗыры гетирилйәр. Биз терҗимеде сөзлери, роваятлары, иң соңкы айдан шахсың адыны гетирмек билен чәклендик.
[2] Гурханың 42-нҗи («Шура») сүресиниң 30-нҗы аяты.
[3] Гурханың 35-нҗи («Фатыр») сүресиниң 10-нҗы аяты.