Başy » Kitaplar » ЗАХЫТЛЫК КИТАБЫ » ЕТИМЕ ХАЙЫР-ЫХСАН ЭТМЕК ХАКДА
Сабыт ибн Аҗлан шейле диййәр: «Ресулалланың шейле диендиги маңа гелип етди: «Ким йүреги авап, элини бир етимиң башына гойса, оңа элиниң деген хер сачының тары мөчберинде согап берлер».
* * *
Сафван ибн Селим шейле диййәр: «Ресулалла бир гезек: «Таква болуп, исле өз етимине, исле башга бириниң етимине кепил гечен, онуң гүн-гүзераныны өз бойнуна алан билен мен җеннетде шу икиси ялыдырыс» дийип, орта бармагы билен сүем бармагыны бирлешдирип гөркезди».
* * *
Абу Хурейра шейле диййәр: «Пыгамбер алайхыссалам: «Мусулманың өйүниң иң говусы, ичинде етимлере ыхсан эдилйән өйдүр. Мусулманың өйүниң иң эрбеди хем ичинде етимлере эрбетлик эдилйән өйдүр» дийип, ики бармагыны галдырып: «Мен билен етиме ярдам эден киши җеннетде шейле боларыс» дийди».
* * *
Абу Умама шейле диййәр: «Пыгамбер алайхыссалам шейле дийди: «Ким Алла үчин бир етимиң башыны сыпаласа, элиниң деген хер бир сачының саны ялы оңа согап язылар. Ким өз етимине я-да башганың етимине хемаят этсе, мен билен ол киши икимиз җеннетде шу икиси ялы боларыс» дийип, ики бармагыны бирлешдирди».
* * *
Мәлик ибн Амр шейле диййәр: «Пыгамбер алайхыссалам шейле дийди: «Ким бир етими, өзи гурпланянча серетмек үчин мусулман эне-ата экленҗе берсе, элбетде, җеннет оңа ваҗып болар».