Başy » Kitaplar » ЗАХЫТЛЫК КИТАБЫ » ДҮНЙӘНИҢ ЯЗГАРЫЛМАГЫ ХАКДА
Халыт ибн Умейр Адавы шейле диййәр: «Утба ибн Газван хутба окады. Өңүрти Аллатагала хамду-сена этди, соң шейле дийди: «Дүнйе малы өзүниң адамлардан айрылҗакдыгыны ыглан эдип, йүз өврендир. Ондан диңе ичер ялы бирнәче дамҗа галандыр. Сиз ондан эбеди өе гөчйәрсиңиз. Сиз өзүңиздәки иң хайырлы задыңыз билен гөчүң. Себәби бизе: «Довзахың ичине зыңлан даш етмиш йылдан хем гирдаба етмез» дийилди. Валла, довзах гүнәкәрлер капырлар билен долдурылар? Бизе ене-де айдылды: «Җеннетиң гапыларының арасы кырк йыллык ёлдур. Эмма онда-да бу гапының өңүнде көпчүликден яңа хырын-дыкын болан бир гүн гелип етер». Мен өзүми Ресулалла билен бирликде, иймитлери диңе япрак болан ве бу себәпли овучларымыз габаран еди кишиниң единҗиси хөкмүнде гөрйәрин. Бир көйнегим барды, оны Сагт ибн Мәлик билен бөлүшипдим. Ярысына мен, ярысына хем ол доланды. Бу гүн болса биз болелинлик ичинде яшаярыс. Мен өзүмиң өзүми улы хасаплап, Алланың янында болса кичи болмагымдан Аллатагала сыгынярын. Сиз менден соң сынаг эдилерсиңиз».
* * *
Хасан Басры «Дүнйә дурмушы сизи алдамасын. Сизи Алланың өңүнде азгын болан алдамасын»[1] аятыны окан махалы: «Муны ким айтды?» диерди, соң хем: «Аллатагала, себәби оны иң говы билйән олдур» диерди.
* * *
Хасан Басры ене-де шейле диййәр: «Өзүңизи гүймейән затлардан гораң. Себәби дүнйәниң өзүне чекиҗи затлары көпдүр. Бир адам өзүне бир гүйменҗе гапысыны ачса, бу гапы хөкман оңа он саны башга гүйменҗе гапысыны ачар».
* * *
Рухейп шейле диййәр: «Ибн Омар бир эшек сатыпды. Оңа:
— Кәшге эшеги сатмадык болсадың — дийдилер.
Ол хем:
— Ол бизе пейдалыды. Йөне, гайгы-аладасы етикди. Мен калбымың бир зат билен аладаланмагыны хош гөрмедим — дийди».
* * *
Суфян шейле диййәр: «Лукман хеким оглуна шейле дийди: «Эй, оглум! Дүнйә чуң бир деңиз мысалыдыр. Онда көп адам гарк боландыр. Ол ердәки гәмиң — Аллатагала болан ынамың болсун. Долдуран йүкүң — Эзиз ве Җелил Алла иманың болсун. Гәминиң елкени — Алла бил багламагың болсун. Сени халас болҗак ягдайда гөрмейәрин, белки халас боларсың».
* * *
Вехп ибн Мунеббех шейле диййәр: «Бир адам башга бириниң янына барды. Ол өрән гайгылы ве рухы пес ягдайдады.
Ондан:
— Саңа нәме боляр, нәме үчин гайгылы гөрүнйәрсиң? — дийип сорады.
Онда ол:
— Пыланың ягдайы мени гең галдырды. Ол ыбадат эдип, бейик дереҗелере етипди. Соң харсыдүнйә болды — дийди.
Онда ол:
— Сен ёлдан дөнене гең галма-да, дос-догры гидене гең гал! — дийип җогап берди».
* * *
Хасан Басры дүнйә үчин шейле диер экен: «Эй, хапыса! Сениң әхли бир агаҗың мивесинден ийип гөрдүк, эмма хеммесиниң мивеси аҗы экен».
* * *
Хасан Басрыдан эшидилипдир: «Алла диңе өз янында долы маныда әхмиетсиз болмагы ве гафлата дүшмеги үчин оңа көп мал-мүлк берер».
Хасан Басры ене айдяр: «Элиндәкини говы уланан киши хич зада мәтәч болмаз».
* * *
Суфян шейле диййәр: «Көнелер: «Сизиң үчин дүнйәде иң хайырлы зат дүнйәниң өзи билен сынаг эдилмегиңиздир. Дүнйә билен сынаг эдилмегиңизиң иң хайырлысы элиңизден гиден затдыр!» диердилер».
* * *
Сухейл ибн Хассан Келби шейле диййәр: «Пыгамбер алайхыссалам шейле дийди: «Алымларың аякларының үстүнде дик дуруп билмеҗек йылманак дашы — тамакинчиликдир»[2].
* * *
Абуд-Дерда шейле диййәр: «Алланы ятламакдан ве оңа элтйән затлардан башга дүнйә ве ондакы затлар мелгундыр. Диңе алым ве ылым өвренйән догры ёлдадыр. Галанлары болса эйләк-бейләк гезип йөрен ач-хор җандарлар болуп, оларда хич хили хайыр ёкдур».
* * *
Убада ибн Самыт шейле диййәр: «Кыямат гүни дүнйә гетирилер ве дүнйәде Алланың разычылыгы үчин үчин эдилен зат, ягны тагат-ыбадат ондан айрылар. Булардан галанлар довзаха атылар».
* * *
Убей ибн Кагп шейле диййәр: «Адам оглуның иййән затлары хошбой нәрселер ве дуз гошулып, тагамлы хем болса дүнйә меңзейәндир»[3].
* * *
Абдырахман ибн Авфың оглы Абу Селеме шейле диййәр: «Пыгамбер алайхыссалам айтды: «Шейтан шейле дийди: «Бай адам үч зат себәпли менден халас болуп билмез. 1.Мал-мүлки онуң үчин безәрин, бу оңа мал-мүлкүни дегишли ерине бермегине пәсгел болар. 2.Мал-мүлки газанма ёлларыны аңсатлашдырарын, ол хем оны нәхак ере сарп эдер. 3.Оңа байлыгы говы гөркезерин, ол хем оны нәхак ерден газанар».
* * *
Ибн Месгут шейле диййәр: «Шейтан адам оглуны хер хили ёл билен тутмакчы болар. Йөне, ынсан ондан гачар. Шейтан мал-мүлкүниң янында оңа япышар ве оны еңсесинден тутар».
* * *
Энес ибн Мәлик шейле диййәр: «Ресулалла айтды: «Хакыкатдан хем Аллатагала ахыретиң ниети үчин дүнйәни берер, эмма дүнйә ниети үчин ахырети хич бермез».
* * *
Абуд-Дерда шейле диййәр: «Эгер сиз маңа араңыздан бириниң сизиң иң такваңыздыгына ант ичсеңиз, мен хем онуң сизиң иң хайырлыңыздыгына ант ичейин».
* * *
Суфян Сөври шейле диййәр: «Ыбрайым Тейми айтды: «Сиз билен сахабаларың арасында нәхили тапавут бар?! Дүнйә олара бакды, эмма сахабалар ондан гачдылар. Сизден болса дүнйә йүз өвүрди, эмма сиз онуң ызында гезйәрсиңиз».
* * *
Салым ибн Абул-Җагт биринден шейле роваят эдйәр: «Ресулалла айтды: «Маңа ер йүзүниң ачарлары гетирилип, элиме берилди. Эмма сизиң пыгамбериңиз иң говы ёлы сайлап алды. Сиз хем дүнйә гирифтар болдуңыз. Онуң гатышык тагамларындан, сарысындан, гызылындан, яшылындан ве агындан иййәрсиңиз. Эмма ол шол бир затдыр. Леззет алмак үчин оны булашдырдыңыз».
[1] Гурханың 31-нҗи («Лукман») сүресиниң 33-нҗи аяты.
[2] Ягны бу ерде гөчме маныда „«алымларың сакланып билмеҗек зады» диен маныны аңладяр.
[3] Ягны „«Дүнйә тагамлы нахар ялы сүйҗүдир, йөне соңы, нетиҗеси бидерекдир» диен маныны аңладяр.