Başy » Kitaplar » ЗАХЫТЛЫК КИТАБЫ » ҖЫНАЗАНЫҢ[1] ЫЗЫНДАН ЙӨРӘП БАРЯРКАҢ ПИКИРЛЕНМЕК ХАКДА
Патма бинти Хүсейин шейле диййәр: «Хезрети Әше шейле дийди: «Усейт ибн Худейр абрайлы адамларың бириди. Ол шейле диерди: «Халларымдан үч хала эе болшум ялы болсадым, кәмиллиге етердим:
1. Гурхан оканымда ве окаланда диңленен махалы;
2. Ресулалланың хутбасыны диңлән махалым;
3. Җыназа гатнашанымда.
Мен хер җыназа гатнашанымда мерхума ол дүнйәде эдилҗек затдан башга зат барада пикирленмейәрдим».
* * *
Абдылэзиз ибн Абу Рувват шейле диййәр: «Ресулалла җыназаның ызындан йөрәнде, дымарды. Ичинден оя батарды. Сахабалар Ресулалланың ичинден мерхумың ягдайыны, оңа нәмәниң берилҗекдиги ве ондан нәме соралҗакдыгы барада пикир эдйәндир өйдердилер».
* * *
Салых Мурри бизе Будейлден роваят эдип, шейле диййәр: «Мутаррыф җыназада достларынындан бири билен душушан махалы, оны көпден бәри гөрмедик хем болса, оңа саламдан башга зат диймезди. Өз башына гүмра болуп, ондан дашлашарды».
* * *
Мухаммет ибн Севка шейле диййәр: «Ыбрайым шейле дийди: «Сахабалар җыназа гатнашярдылар. Соң бирнәче гүнләп, гайгылы халда болярдылар. Бу гайгы оларда әшгәр гөрүнйәрди».
* * *
Кайс ибн Сагт ибн Убада шейле диййәр: «Ресулалланың сахабалары сөвеш махалы, Гурхан окалярка ве җыназаларда пессай сеси говы гөрйәрдилер».
* * *
Абу Сагыт Худры шейле диййәр: «Ресулалла шейле дийди: «Хассаларың халыны сораң, җыназаларың ызындан йөрәң! Ол сизе ахырети ятладар».
* * *
Мугавыя ибн Курра шейле диййәр: «Мени үч зат гүлдүрди ве үч зат хем аглатды. Мениң гүлмегиме себәп болан затлар: 1. Өлүм өзүни гөзлейәркә дүнйә хөвес эдйән; 2. Өзүниң эдйән әхли херекетлерини хеммелер билсе хем өзи мундан бихабар болан; 3. Алла ондан разымы, оңа газаплымы, билмесе хем, лакгылдап гүлйән.
Мениң агламагыма себәп болан затлар: 1. Достларың, Мухаммет алайхыссаламың ве онуң сахабаларының гитмеги; 2. Өлүм пурсатында эмеле гелҗек горкы; 3. Эзиз ве Җелил Алланың янында гизлин затларың әшгәр болан гүни җеннетеми, довзахамы, нирә гитҗекдигими билмезлигим».
* * *
Мухаммет ибн Абдырахман ибн Невфеле гелип етен бир хабара гөрә, пыгамбер алайхыссаламың аялы Сөвда энемиз пыгамберимизе:
— Эй, Алланың илчиси! Бизден бири ёгаланда җыназа намазымызы сен гелйәнчәң Осман ибн Мазгун окасын — дийди.
Онда Ресулалла оңа:
— Өлүмиң нәмедигини билседиң, эй, Земганың гызы, онуң гүйч етирерден хас агырдыгыны дуярдың! — дийди».
* * *
Мухаммет ибн Урве шейле диййәр: «Пыгамбериң сахабаларындан, үстүнден гүлүнйән бир аял ёгалды. Билал:
— Гөргүлиҗик, рахатлыга говушды — дийди.
Онда Ресулалла:
— Диңе гүнәлери гечилен рахатлыга говшар — дийди».
[1] Җыназа сөзи бу ерде мерхумың җыназа намазына гатнашмак, мерхумың табыдыны мазарыстанлыга ченли гөтермек, ерлемек, үстүне гум сүрмек ялы ишлери өз ичине аляр.