Başy » Kitaplar » ЗАХЫТЛЫК КИТАБЫ » ПИКИРЛЕНМЕК ВЕ НЕТИҖЕ ЧЫКАРМАК ХАКДА
Ысмайыл ибн Абу Халыт шейле диййәр: «Тарык ибн Шыхапдан эшитдим: «Абу Бекр Сыддык: «Эҗизлик дөврүнде өленлер, гөр, нәхили багтлы!» дийди. Мен Тарыкдан эҗизлик дөврүниң нәмедигини сорадым. Онда ол: «Ялңышмаян болсам, ысламың көмекчилериниң аз болуп, эҗиз болан я-да ысламың башлангыҗындакы дөвүр болмалы» дийди».
* * *
Мухаммет ибн Кагп Куразы шейле диййәр: «Аллатагала бир гулда хайыр ислән махалы, оңа үч айратынлык берер:
1. Динде дүшүнҗели болмак;
2. Аз зат билен канагат этмек;
3. Өз кемчиликлерини гөрмек.
* * *
Ымран Куфы шейле диййәр: «Меръем оглы Иса шәгиртлерине шейле дийди: «Өвреден затларыңыз үчин хич зат алмаң. Эй, ер йүзүниң дузлары! Заяланмаң! Себәби заяланан зат диңе дуз билен дүзедилйәндир. Эгер дуз заяланса, онуң хич хили эми ёкдур. Сизде наданлыкдан гелен ики задың бардыгыны билиң:
1. Ерликсиз гүлки;
2. Гиҗе Аллатагала үчин ыбадат этмән, сәхер вагты укламак.
* * *
Халеп ибн Хушып шейле диййәр: «Меръем оглы Иса шәгиртлерине шейле дийди: «Сизе хөкүмдарларың хикмети гоюшлары ялы, сиз хем дүнйәни олара гоюң».
* * *
Хасан Басры шейле диййәр: «Вераг[1] ве пикирленмек, элбетде, амалларың иң ягшыларының биридир».
* * *
Авн ибн Абдылла шейле диййәр: «Үмми Дердадан:
— Абуд-Дерданың иң көп ыбадаты хайсыды? — дийип сорадым.
Ол хем:
— Пикирленмек ве нетиҗе чыкармак — дийди».
* * *
Мухаммет ибн Кагп Куразы шейле диййәр: «Узынлы гиҗе «Зилзиле»[2] ве «Карыга»[3] сүрелерини окап, хич зат гошмаздан ве ызыгидерлиликде өңүрти бирини, соң бейлекисини пикирленип окамагым, маңа бүтин гиҗәмде Гурханы чалтлык билен окамагымдан говудыр».
* * *
Ыкрыма шейле диййәр: «Ибн Апбас шейле дийди: «Пикир ичинде, ховлукман орта дереҗеде окалан ики рекат намаз, калп бихабар болуп, бүтин гиҗе намаз окамакдан хас хайырлыдыр».
* * *
Абдылла ибн Амр ибн Ас шейле диййәр: «Үч зат бардыр, онуң эеси хем җомарт хем-де тыгшытлы хасапланар:
1. Долы ерине етирилен парзлар;
2. Гача дурлан эрбетликлер;
3. Гапыллыга сейрек дүшмеклик.
Ене үч саны зат бар, олардан хабардар бол:
1. Эден хайыр ве даш дуран шер ишиңи йөнекей хасаплама;
2. Гүнәлериң багышланмагы үчин хайыш этмегиң саңа агыр дегмесин;
3. Оюндан даш дур! Себәби оюн билен максадыңа етип билмерсиң, ахырети хич хачан газанып билмерсиң. Әхли затларың хөкүмдары Аллатагала хем оюн себәпли сенден разы болмаз. Довзах диңе Алланың газап эденлери үчин ярадыландыр. Мен сени Эзиз ве Җелил Алланың газабындан горап дуйдурярын».
* * *
Абдылла ибн Месгут шейле диййәр: «Хак кындыр ве пейдалыдыр. Батыл болса еңил ве хассалыкдыр. Ниҗеме аз вагтлык леззет бардыр, ол узак вагтлык гайгыны мирас гояр».
* * *
Усаме ибн Зейт шейле диййәр: «Нафыг маңа Ибн Омарың тәретсиз ягдайда отурандыгыны гөрмәндигини хабар берди».
* * *
Ибн Апбас шейле диййәр: «Ресулалла бушукмага чыкарды ве деррев топрак билен тейим эдерди[4]».
Мен оңа:
— Эй, Алланың илчиси! Сув якын ерде ахыры — диердим.
Ол хем:
— Белки, мен оңа етип билмерин — диерди».
* * *
Хасан Басры шейле диййәр: «Сизден өңкүлер тәрет бозмага гиденлеринде, тәретсиз вагтында Алланың эмриниң гелмегинден горкуп, янларына сув алардылар. Мейдан ишлерини эденсоңлар, деррев тәрет кылардылар».
* * *
Ыбрайым шейле диййәр: «Маңа шейле роваят эдилди: «Пыгамбер алайхыссалам хаҗатханадан геленде, тәретсиз ягдайда хич гөрлен дәлдир, ол хемише тәретлиди».
* * *
Халыт ибн Мыгдан шейле диййәр: «Киши Алланың буйрукларыны ерине етирендиклери үчин адамлары өзүнден улы хасаплап, өзүни песлериң хем песлери хасапламаса, динде долы дүшүнҗели хасапланмаз».
* * *
Ибн Омар шейле диййәр: «Киши динлериниң борчларыны ерине етирмейәндиклери үчин ынсанлары акмак хасапламаса, иманың хакыкатына етен хасапланмаз».
* * *
Гайлан ибн Җерир шейле диййәр: «Бир гүн Мутаррыф бизе өврүлип: «Эгер мен небсимден разы болсам, элбетде, сизе гахарланардым. Йөне мен ондан разы дәл» дийди».
* * *
Хумейт ибн Хилал шейле диййәр: «Мутаррыф шейле дийди: «Мен ынсаны бейик Ребби билен шейтаның арасында зыңлан ягдайда гөрдүм. Эгер Ребби ынсаны галдырмак я-да халас этмек ислесе, элбетде, халас болар. Эмма оны шейтана гойса, шейтан ал салар».
[1] Вераг — гүнә иш эдәймәйин диен горкы ичинде болмак.
[2] Гурханың 99-нҗы сүресиниң ады.
[3] Гурханың 100-нҗи сүресиниң ады.
[4] Тейим этмек – сув ёк еринде топрак билен месх этмек.