Başy » Kitaplar » ЗАХЫТЛЫК КИТАБЫ » ПЫГАМБЕРИҢ САХАБАЛАРЫ ХАКДА
Алы ибн Абу Талха шейле диййәр: «Бир гезек Ресулалла метҗиде гелди. Эмма ол ерде хич кими гөрмеди. Метҗидиң бурчунда отуранларың сеслерини эшитди. Оларың янына гелип:
— Сиз намаза гарашярмысыңыз? Сизден өңки ымматларда болмадык бир намаз бардыр. Ол хем яссы намазыдыр — дийди. Соң асмана назар эдип:
— Йылдызлар асманың саламатлыгыны үпҗүн эдйәндир. Оларың ышыгы сөненсоң, асмана вада берлен зат гелер. Мен хем сахабаларым үчин бир саламатлыкдырын. Мен ёгаланымдан соң, сахабаларыма вада берлен зат гелер. Сахабаларым хем ымматым үчин бир саламатлыкдыр. Сахабаларым гиден махалы ымматыма вада эдилен зат гелер — дийди».
* * *
Осман ибн Хайям шейле диййәр: «Үмми Дерда билен нахар ийдик. «Элхамду лилләх»[1] диймеги унутдык. Онда Үмми Дерда: «Эй, огулларым! Ийип-ичип боланыңыздан дыммакдан хас хайырлы болан зады, ягны шүкүр эдип, төвирлериңизе Алланың адыны гошмагы терк этмәң» дийди».
* * *
Эвзайы шейле диййәр: «Ресулалла шейле дийди: «Мен гарнымы нәме билен доюраныма әхмиет бермейәрин».
* * *
Энес ибн Мәлик шейле диййәр: «Ресулалла шейле дийди: «Сахабаларым ымматымың ичинде нахарың дузы ялыдыр. Нахар диңе дуз билен тагамлыдыр».
Хасан Басры үстүне шуны хем гошды: «Бизиң дузумыз гитди, инди нәдип дүзелмели?».
* * *
Хайсеме шейле диййәр: «Давут оглы Сүлейман пыгамбер шейле дийипдир: «Хер дүрли яшайыш усулыны – юмшагыны хем гатысыны сынап гөрдүк Онуң иң пес боланының хем яшайыш үчин етерликдигини гөрдүк».
* * *
Мусгап ибн Сагт ибн Вакгас шейле диййәр: «Хезрети Омара гызы Хафса:
— Шу эшигиңден хас юмшаграгыны гейсең, шу иййән нахарыңдан хас говусыны ийсең болмазмы? Алла саңа болелинлик берди ве рысгалыңы көнелтди — дийди.
Онда Хезрети Омар:
— Сениң бу сөзлериңе гаршы сениң билен җеделлешҗек — дийди ве оңа Ресулалланың ягдайыны, яшайыш кынчылыкларыны гүррүң берди.
Хафса муңа аглады. Соң Хезрети Омар:
— Мен шу кын яшайышда икиси[2] ялы болҗак. Белки, гиңишлиге[3] хем олар билен бирликде говшарын — дийди».
Бу хадысдан хезрети Омарың пыгамберимизи ве ондан соң хезрети Абу Бекр Сыддыгың яшайшыны нусга эдинендигине гөз етирйәрис.
* * *
Хасан Басры Ресулалланың ады агзаланда шейле диер екен: «Онуң янына адамларың гелмегине пәсгел болмаз ялы гапылар япылмазды, сакчылар гоюлмазды. Оңа эртирлик ве агшамлык нахары улы питилерде гетирилмезди. Ол әшгәр гөрнерди, гизленмезди. Ислендик адам пыгамбер алайхыссалам билен душушып билерди. Алладан ант ичйәрин, ол ерде отурярды, нахарыны ерде гойярды, сада эшик геййәрди ве ата мүнйәрди, ызына хем башга бирини мүндүрйәрди. Тагамдан соң, элини-де ялаярды».
* * *
Хезрети Омарың гулы Эслем шейле диййәр: «Абу Суфяның оглы Мугавыя хезрети Омарың янына гелерди. Ол акягыз, берк беденли ве гөрмегейди. Бир гезек хезрети Омар онуң билен хаҗа гитди. Ёлда хезрети Омар оңа середип, гең галды. Соң бармакларыны онуң аркасына атанаклайын гоюп ве галдырып:
— Өрән оңат! Өрән оңат! Дүнйә ве ахыретиң әхли ныгматлары бизиң үчин бир ере җемленен, биз хем иң хайырлы адамлар — дийип, оны яңсылады.
Онда Мугавыя оңа:
— Эй, мөминлериң эмири! Мен хаммамларың янындакы хасыллы топракларда яшаярын — дийди.
Онда хезрети Омар оңа:
— Мен хем сенде бар болан нахарларың иң говуларыны иймезлигиңи, гүн аркаңа урянча ве мәтәчлер хем гапың аңырсында гарашярка укуда ятмазлыгыңы маслахат берйәрин — дийди.
Олар За Тува[4] диен ере геленлеринде, Мугавыя хорҗунындан башга бир эшик чыкарып, оны гейди. Хезрети Омар онуң эшигинден хошбой ыс алды. Онда хезрети Омар:
— Өзүң-ә хаҗа ниет эдйәрсиңиз. Хаҗы болмак үчин хошбой ыслары терк эдип, ёла чыкярсың. Хачанда Алланың иң мукаддес ери болан Кәбә гелениңден соң, хошбой ыса эйленен ялы эшик гейинйәрсиң — дийди. Мугавыя хем ол эшигини чыкарып, өңки ыхрам[5] эшиклерини гейди».
* * *
Ибн Тавус какасындан шейле роваят эдйәр: «Омар ибн Хаттап Абу Суфяның оглы Езидиң гарнының дерисиниң нәзикдигини гөрди. Ол гамчысыны онуң гарнына дүртүп: «Бу капырың дерисине меңзейәр?» дийди».
* * *
Сагыт ибн Җубейр шейле диййәр: «Хезрети Омара Абу Суфяның оглы Езидиң хер хили үйтгешик нахарлары иййәндигиниң хабары гелди. Ол Езидиң Ерфе атлы бир хызматкәрине: «Онуң агшам нахары тайяр боланда маңа хабар бер» дийди. Ол хем агшам нахары тайяр боланда хабар берди. Хезрети Омар гелди. Салам берип, ругсат сорады. Ругсат берленсоң гирди. Езидиң агшам нахары гетирилди. Өңүрти говурма гетирилди. Хезрети Омар онуң билен отурып, говурмадан ийди. Соң кебап гетирилди. Езит элини узатды, хезрети Омар элини чекди. Соң хезрети Омар оңа:
— Эй, Абу Суфяның оглы Езит! Нахардан соң ене нахармы? Омарың барлыгы гудрат элинде болан Алладан ант ичйәрин, сиз сахабаларың ёлундан узаклашып, олара гаршы чыкярсыңыз. Ынсанлар нәмә өвренишселер, соң ол затлар билен гаршы чыкарлар — дийди.
Бу роваяты диңе Ибн Мүбәрек шейле роваят эдендир.
* * *
Хасан Басры шейле диййәр: «Мөминлериң эмири хезрети Омарың янына Абу Муса Эшгарыны алып, басралылардан бир топар гелди. Олар шейле гүррүң бердилер:
«Биз онуң янына барярдык, ол хер гүн диңе гуры чөреги сува эзип иййәрди. Кәмахаллар янында аз-овлак месге, зейтун ягы ве сүйт гөрйәрдик. Кәмахал хем сувда гайнадылан гуры эт, сейрек махалам тәзе эт гөрйәрдик. Бир гүн ол бизе:
— Сизиң мениң аз иййәндигими халамаяндыгыңызы гөрйәрин. Эгер мен ислесем, сизиң иң говы нахарлары иййәниңизиң, иң говы яшаяныңызың бири болардым. Мен сизиң иййән дүе өркүҗиңизден, кебабыңыздан, дәнелериңизден ве юмшак чөрегиңизден бихабар дәл. Йөне мен Аллатагаланың эден бир ишлери себәпли бир тайпаны язгарып: «Ягшылыкларыңызы бу дурмушда гидердиңиз. Олардан деррев пейдаландыңыз»[6] диендигини билйәрин — дийди.
Биз Абу Муса Эшгары билен гүрлешдик. Ол бизе:
— Мөминлериң эмирине айдың, белки бейтил-малдан[7] сизе иер ялы бир затлар берер — дийди.
Биз хем барып оңа айтдык. Онда хезрети Омар:
— Эй, эмирлер җемагаты! Сиз мениң разы болан задыма разы болмаярмысыңыз? — дийди.
Биз:
— Эй, мөминлериң эмири! Медине гүн-гүзераның өрән кын болан ери. Биз сизиң яныңызда адамларың үйшүп нахарланяндыкларыны гөрмейәрис. Биз болчулык болан бир ерде яшаярыс. Эмирлеримизиң дашына үйшүп, нахары биле иййәрис — дийдилер.
Хезрети Омар бираз башыны эгди, оя батды. Соң келлесини галдырып:
— Сиз үчин бейтил-малдан ики гоюн ве дөрт кейле[8] бугдай берейин. Эртир гоюнларың бирини союп, этине ики кейле бугдайы гошуп, нахар биширип достларыңыз билен ийиң. Соң ичер ялы зат ал, сагыңдака, соң оларың ызындака хем ичир. Соң ишиң башына гит. Агшам дүшенсоң галан гоюн билен ики кейле бугдайы бишир, оны хем достларыңыз билен ийиң. Үнс бериң! Адамларың өйлериндәки машгалаларыны хем ийдирип, олары хем дойруң. Чүнки адамлары газан-газан нахарлара чагырмак, оларың ахлакларыны дүзелтмез ве гөзлерини доюрмаз. Валла, мен хер гүн ики гоюн ве дөрт кейле бугдай алнан ве оны гысга мөхлетиң ичинде хеләк этмедик улы бир обаны билмейәрин — дийди».
* * *
Ибн Тавус какасындан роваят эдйәр: «Хезрети Омарың дөврүнде ынсанлар гахатлыга сезевар болдулар. Хезрети Омар хем бейлеки адамлар ялы не яг, не-де яглы зат ийди».
* * *
Алкама ибн Абдылла Музени шейле диййәр: «Омар ибн Хаттаба бир ат гетирилди. Ол:
— Бу нәме? — дийип сорады.
Оңа:
— Эй, мөминлериң эмири! Бу кесеки хөкүмдарларың мүнйән, бакышы ве дуршы хайбатлы, гөзел бир хайван — дийдилер.
Хезрети Омар еринден турды ве оңа мүнди. Хайван йөрәп башлады ве гершини өңе эдип, бөкүп башлады. Хезрети Омар:
— Бу нәхили эрбет эшек! Алла җезасыны берсин — дийди ве үстүнден дүшди».
* * *
Хасан Басры шейле диййәр: «Омар ибн Хаттап шейле дийди: «Уны элемәң! Себәби онуң кепеги хем иймитдир».
* * *
Есар ибн Немир шейле диййәр: «Мен хезрети Омарың унуны диңе онуң эмрине гөрә эледим».
* * *
Тарык ибн Шыхап шейле диййәр: «Хезрети Омар Шама гелен махалы оңа бир ат гетирилди. Онуң үстүне мүнди, ол бөкүп башлансоң, гөвнүне ярамады ве ол ондан дүшүп дүесине мүнди.
Өңүнден бир арык чыкды. Дүесинден дүшди. Аякгапларыны чыкарып, элине алды. Дүесиниң йүпүнден тутуп, сува гирди. Онда Шамы эелейҗи серкерде Абу Убейда ибн Җеррах хезрети Омара:
— Сиз ерли халкың янында улы иш эдип, песпәллигиңизи гөркездиңиз — дийди.
Онда хезрети Омар онуң гурсагына урды. Сесини гаталдып:
— Кәшге, муны сенден башга бири айтсады, эй, Абу Убейда! Чүнки сиз бир махаллар ынсанларың иң зелили, гарыбы ве пес гөрүлйәнидиңиз. Алла сизе ыслам билен ыззат берди. Сиз хачан Алладан башгасы билен абрайлы болмагы гизлесеңиз, Алла сизи зелил кылар — дийди».
* * *
Касым ибн Мухаммет шейле диййәр: «Шама хезрети Омар билен бирликде гиден онуң гулы Эслемиң шейле диендигини эшитдим: «Хезрети Омар Шама етип барярка, ёлда дүесини чөкерди. Хаҗаты үчин гитди. Мен хем дерими дүйәмиң үстүне атдым».
Хезрети Омар гайдып геленсоң, Эслемиң дүесине мүнүп, дериниң үстүнде отурды. Эслем хем хезрети Омарың дүесине мүнди. Олар бираз йөрәнсоңлар, ерли халк олары гаршы алды.
Соң Эслем шейле гүррүң берди: «Мен олара салам бердим. Бизе голайлашанларында олара хезрети Омары гөркездим. Олар өз араларында пышырдашмага башладылар. Хезрети Омар маңа: «Оларың гөзлери Хакдан несиби болмадык кишилериң улагларыны гөзлейәр» дийди.
Хезрети Омар муны диймек билен кесеки хөкүмдарларың мүнйән овадан ве беземен улагларыны гөз өңүнде тутарды».
* * *
Хышам ибн Урва какасындан роваят эдйәр: «Хезрети Омар ибн Хаттап Шама гелди. Гошуның эмирлери ве ол ериң халкының ёлбашчылары деррев оны гаршыладылар. Хезрети Омар олардан:
— Доганым ниреде? — дийип сорады.
Олар:
— Ким ол? — дийип сорадылар.
Ол хем:
— Абу Убейда — дийди.
Олар:
— Хәзир сизиң яныңыза гелер — дийдилер.
Эп-эсли салымдан соң Абу Убейда йүп билен ногталанан инениң үстүне мүнүп гелди. Хезрети Омара салам берди ве онуң хал-ягдайыны сорады. Хезрети Омар ынсанлара:
— Хер ким өз иши билен болсун — дийди ве Абу Убейда билен онуң өйүне ченли гелди. Оңа мыхман болды. Онуң өйүнде диңе гылыҗының, галканының ве мүнйән дүесиниң гөтерип билҗек аз задының бардыгыны гөрди. Хезрети Омар оңа:
— Пейдаланар ялы бир затлар эдинседиңиз — дийди.
Абу Убейда болса оңа:
— Эй, мөминлериң эмири! Бу затлар бизиң дынч алыш еримизе, ягны мазара ченли етерликдир — дийип җогап берди».
* * *
Хышам какасы Урвадан шейле роваят эдйәр: «Хезрети Омарың Эзригат[9] шәхериндәки хәкими шейле дийди: «Хезрети Омар бизе гелди. Эгнинде пагтадан докалан сада көйнеги барды. Оны маңа берип:
— Юв ве йыртык ерлерини яма — дийди.
Мен хем ювуп, ямадым. Соң мен шол өлчегде бир көйнек тикдим ве икисини хем оңа гетирдим. Оңа:
— Бу сизиң көйнегиңиз, муны хем сизе геймек үчин тикдим — дийдим.
Хезрети Омар тәзе көйнеги эли билен барлап гөрди, юмшак гөрди. Соң болса:
— Муңа мәтәчлигим ёк – дийди ве өңкүни гөркезип – бу дери өзүне говы чекйәр — дийди».
* * *
Энес ибн Мәлик шейле диййәр: «Мен Хезрети Омарың көйнегиниң ики эгниниң арасында дөрт яма гөрдүм».
* * *
Яхя ибн Абу Кесир шамлы бир адамдан шейле роваят эдйәр: «Бир гезек Абу Зериң янына бардым. Ол газанының ашагындакы оды ягышда галан чыг одун билен туташдырярды ве бир яндан хем түссе зерарлы гөзяшлары акярды. Аялы оңа:
— Сениң муны этмезлиге хем мүмкинчилигиң бар. Ислесең, сениң ериңе муны башга бири эдерди — дийди.
Ол хем аялына:
— Мен Үмми Зер! Бу хем мениң дурмушым. Ислесең разы боларсың, ислесең сени Алланың хемаятына гоярын[10] — дийди.
Соң агзына сув алан ялы болды. Ахыры газандакы бишенсоң, чанагың ичине гатан чөреклери дограды. Соң газандакыны гетирип үстүне гуйды. Оны аялының янына гетирип:
— Ал ий — дийди. Отурып биле ийдик. Соң гырнагына:
— Бизе ичер ялы бир зат гетир — дийди.
Гырнак бизе гечи сүйдүниң сүзмесинден тайярланан чал хөдүрледи. Мен оңа:
— Эй, Абу Зер! Өйүңде рахат яшасадың — дийдим.
Ол хем:
— Эй, Алланың гуллары! Хасабыңызың мундан хас көп болмагыны ислейәрмисиңиз? Мысал үчин, үстүнде ятян шу дүшегимиз, шу абамыз,[11] геййән шу эшиклеримиз, ичинде нахар биширйән шу газанымыз, ичинде нахар иййән шу чанагымыз, шу яг габымыз, шу унлы халтамыз! Эйсем сен маңа мундан хас көпүни ислейәрмисиңиз? — дийди.
Мен:
— Саңа берилйән айлык дөрт йүз динар, бу дийсең ёкары. Ери, бу пуллар нирә гидйәр? — дийип сорадым.
Ол маңа:
— Сенден асла гизлемерин. Мениң бир обада отуз атым бар. Айлыгымы аланымдан соң олара саман, атбакарлар үчин азык, машгалам үчин хем азык сатын алярын. Эгер бир зат галса, оны хем гырнагың янында шу ере гойярын. Машгаламың эте мәтәчлиги бар болса, ондан алярлар. Башга бир зада мәтәч болсалар хем ол пулдан алярлар. Ол атлары Алла ёлунда атлылар үчин тайярлаярын. Абу Зериң машгаласында дирхем хем, динар хем болмаз — дийип җогап берди».
[1] «Алла хамду-сена болсун» дийип төвир галдырмак.
[2] Бу ерде пыгамберимиз ве Абу Бекр Сыддыгы гөз өңүнде тутуляр.
[3] Гиңишлик — бу ерде җеннет гөз өңүнде тутуляр.
[4] За Тува – Мединәниң голайында бир ер ады.
[5] Ыхрам – хаҗа гидиленде гейилйән ак эшик.
[6] Гурханың 46-нҗы («Ахкаф») сүресиниң 20-нҗи аяты.
[7] Бейтил-мал – дөвлет газнасы.
[8]1 кейле – такмынан 40 литре дең.
[9] Эзригат – Сирияда бир шәхер ады.
[10] Ягны талагыңы берерин.
[11] Аба – еңсиз ве гиң тикилйән эркеклериң үст гейими.